ଟି-୨୦ ବିଶ୍ୱକପ୍‌ବେଳେ ଆତଙ୍କବାଦୀ ଆକ୍ରମଣ ଧମକ: ବଢିଲା ଚିନ୍ତା

ନୂଆଦିଲ୍ଲୀ,୬।୫:ଆଇପିଏଲ ୨୦୨୪ ସିଜନ ପରେ ତୁରନ୍ତ ଜୁନ ୧ରୁ ଆମେରିକା ଏବଂ ୱେଷ୍ଟଇଣ୍ଡିଜ ରେ ଟି-୨୦ ବିଶ୍ୱକପ ଅନୁଷ୍ଠିତ ହେବ। ଏଥିପାଇଁ ଅନେକ ଦଳ ସେମାନଙ୍କ ଖେଳାଳିଙ୍କ ନାମ ଘୋଷଣା କରିଛନ୍ତି ଏବଂ ଟୁର୍ନାମେଣ୍ଟ ପାଇଁ ପ୍ରସ୍ତୁତି ଶେଷ ପର୍ଯ୍ୟାୟରେ ପହଞ୍ଚିଛି। ଏହି ଟୁର୍ନାମେଣ୍ଟରେ ଆତଙ୍କବାଦୀ ଆକ୍ରମଣର ଛାୟା ଦେଖାଦେଇଛି ଏବଂ ୱେଷ୍ଟଇଣ୍ଡିଜ ଟି-୨୦ ବିଶ୍ୱକପ ସମୟରେ ଆକ୍ରମଣର ଧମକ ପାଇଛି। ତେବେ କ୍ରିକେଟ ୱେଷ୍ଟଇଣ୍ଡିଜ (ସିଡବ୍ଲୁଆଇ) ସୁରକ୍ଷାକୁ ନିଶ୍ଚିତ କରିଛି।
ଉତ୍ତର ପାକିସ୍ତାନରୁ ଟି-୨୦ ବିଶ୍ୱକପ ସମୟରେ ଆତଙ୍କବାଦୀ ଆକ୍ରମଣର ଧମକ ମିଳିଛି। ପ୍ରୋ ଇସଲାମିକ ଷ୍ଟେଟ (ଆଇଏସ) କ୍ରୀଡା ଇଭେଣ୍ଟ ସମୟରେ ଆକ୍ରମଣ କରିବାକୁ ଯୋଜନା କରିଛି। ଆଇଏସ ଖୋରାସାନର ଆଫଗାନିସ୍ତାନ-ପାକିସ୍ତାନ ଶାଖାରୁ ଏକ ଭିଡିଓ ବାର୍ତ୍ତା ପ୍ରକାଶ ପାଇଛି। ଏଥିରେ ଅନେକ ଦେଶରେ ଆକ୍ରମଣ କରିବା ବିଷୟରେ ଆଲୋଚନା କରାଯାଇଛି ଏବଂ ଏଥିରେ ଯୋଗଦେବାକୁ ସମର୍ଥକମାନଙ୍କୁ ନିବେଦନ କରାଯାଇଛି।
ଆତଙ୍କବାଦୀ ଆକ୍ରମଣର ଆଶଙ୍କା ମଧ୍ୟରେ ଟି-୨୦ ବିଶ୍ୱକପ ସହ-ଆୟୋଜକ କ୍ରିକେଟ ୱେଷ୍ଟଇଣ୍ଡିଜର ସିଇଓ ଜନି ଗ୍ରେଭସ ସୁରକ୍ଷା ଚିନ୍ତାକୁ ସମ୍ପୂର୍ଣ୍ଣ ରୂପେ ଖାରଜ କରିଛନ୍ତି। କୌଣସି ବିପଦର ମୁକାବିଲା ପାଇଁ ବିସ୍ତୃତ ରଣନୀତି ସହ ଆଗକୁ ବଢିବା ପାଇଁ ଆମେ ଆୟୋଜକ ଦେଶ ତଥା ସହରର ଅଧିକାରୀଙ୍କ ସହ ଘନିଷ୍ଠ ଭାବରେ କାର୍ଯ୍ୟ କରୁଛୁ ବୋଲି ଗ୍ରେଭସ କହିଛନ୍ତି। ଆମେ ସମସ୍ତ ଅଂଶୀଦାରଙ୍କୁ ନିଶ୍ଚିତ କରିବାକୁ ଚାହୁଁଛୁ ଯେ ଟି-୨୦ ବିଶ୍ୱକପ ସହିତ ଜଡିତ ସମସ୍ତଙ୍କ ସୁରକ୍ଷା ଆମର ସର୍ବୋଚ୍ଚ ପ୍ରାଥମିକତା। ଆମର ଏକ ବିସ୍ତୃତ ଏବଂ ଦୃଢ ସୁରକ୍ଷା ଯୋଜନା ଅଛି।