शिंदे गटाच्या आमदारांच्या अपात्रतेच्या याचिकेवर निर्णय घेण्यासाठी विधानसभा अध्यक्षांना अंतिम मुदत.............. सुप्र

शिंदे गटाच्या आमदारांच्या अपात्रतेच्या याचिकेवर निर्णय घेण्यासाठी विधानसभा अध्यक्षांना अंतिम मुदत..............

सुप्रीम कोर्टाचे आदेश

नवी दिल्ली: महाराष्ट्राच्या राजकारणासाठी पुन्हा एकदा मोठी बातमी येत आहे. मुख्यमंत्री एकनाथ शिंदे गटातील शिवसेना आमदारांच्या अपात्रतेच्या याचिकेवर निर्णय घेण्यासाठी महाराष्ट्र विधानसभा अध्यक्षांना अंतिम मुदत देण्याचे निर्देश सुप्रीम कोर्टाने दिले.

निर्णय घेण्यास होत असलेल्या दिरंगाईबद्दल नाराजी व्यक्त करत मुख्य न्यायमूर्ती डी वाय चंद्रचूड म्हणाले की, विधानसभा अध्यक्षांनी सर्वोच्च न्यायालयाच्या प्रतिष्ठेचा आदर केला पाहिजे.
सुप्रीम कोर्टाने महाराष्ट्र विधानसभा अध्यक्षांना महाराष्ट्राचे मुख्यमंत्री एकनाथ शिंदे यांच्यासह ५६ आमदारांविरुद्धच्या अपात्रतेच्या याचिकांवर आठवडाभरात सुनावणी घेण्यास सांगितले आहे. अपात्रतेच्या याचिकांवर निर्णय घेण्यासाठी वेळापत्रक निश्चित करण्याचे निर्देशही न्यायालयाने दिले आहेत.
घटनेच्या दहाव्या अनुसूचीनुसार सभापती कामकाज अनिश्चित काळासाठी स्थगित करू शकत नाहीत. न्यायालयाच्या निर्देशांचा आदर करण्याची भावना असली पाहिजे , असे न्यायालयाने म्हटले आहे. घटनापीठाच्या निर्णयाचा संदर्भ देत सरन्यायाधीशांनी विचारले की, ११ मेच्या न्यायालयाच्या निर्णयानंतर सभापतींनी काय केले? या प्रकरणात दोन्ही पक्षांसह एकूण ३४ याचिका प्रलंबित असल्याचेही खंडपीठाने सांगितले. निकालात सभापतींना अपात्रतेच्या याचिकांवर वाजवी कालावधीत निर्णय घेण्याचे निर्देश दिले होते.