🚗ભાડા કરારના નામે વાહનો હડપતી ગેંગના 5 સાગરીતો ઝડપાયા, 25 લાખનો મુદ્દામાલ જપ્ત

વલસાડ લોકલ ક્રાઈમ બ્રાન્ચ (LCB) એ વાહનોના ભાડા કરારના બહાને છેતરપિંડી કરતી એક રીઢા ગુનેગારોની ગેંગનો પર્દાફાશ કર્યો છે. આ ગેંગના સભ્યો ફોર વ્હીલર અને પીકઅપ વાહનોના માલિકોને મોટી કંપનીઓમાં ઉંચા ભાડા અપાવવાની લાલચ આપી વિશ્વાસમાં લેતા હતા. ત્યારબાદ કાયદેસરના નોટરાઈઝ્ડ ભાડા કરાર કરી વાહનો મેળવી લીધા પછી, માલિકોની જાણ બહાર આ વાહનો અન્ય લોકોને બારોબાર વેચી દેતા અથવા ગીરો મૂકી દઈ આર્થિક લાભ મેળવતા હતા. આ મામલે વાપી ટાઉન પોલીસ સ્ટેશનમાં વિશ્વાસઘાતની ફરિયાદ નોંધાયા બાદ પોલીસે તપાસ તેજ કરી હતી. વલસાડ LCB ની ટીમે બાતમીના આધારે આ ગેંગના ૫ સાગરીતો - સંદિપ પ્રજાપતિ, મનીષ ચાંપાનેરી, અરવિંદ સીંગ, મુસ્તાકઅલી ગોરી અને પરેશ પાલતેવરની ધરપકડ કરી છે. તેમની પાસેથી પોલીસે કુલ ૪ વાહનો જેની કિંમત ૨૫,૦૦,૦૦૦ રૂપિયા અને ૫ મોબાઈલ ફોન મળી કુલ ૨૫,૩૦,૦૦૦ રૂપિયાનો મુદ્દામાલ કબજે કર્યો છે. આ આરોપીઓ સેલવાસ, વાપી અને સંજાણ વિસ્તારના રહેવાસી છે અને વાહનોની લે-વેચની દલાલીના નામે લોકો સાથે છેતરપિંડી કરતા હતા. પકડાયેલા તમામ આરોપીઓને વધુ તપાસ માટે વાપી ટાઉન પોલીસને સોંપવામાં આવ્યા છે.