କେନ୍ଦୁଆରେ କୁଡୁମୀ ବିକାଶ ଭବନର ଶୁଭ ଉଦ୍ଘାଟନ, କୁଡୁମୀ ସଂସ୍କୃତିର ସୁରକ୍ଷା ଓ ବିକାଶ ଉପରେ ଗୁରୁତ୍ୱାରୋପ।

*କେନ୍ଦୁଆରେ କୁଡୁମୀ ବିକାଶ ଭବନର ଶୁଭ ଉଦ୍ଘାଟନ, କୁଡୁମୀ ସଂସ୍କୃତିର ସୁରକ୍ଷା ଓ ବିକାଶ ଉପରେ ଗୁରୁତ୍ୱାରୋପ*


କେନ୍ଦୁଝର, ୭ ଜୁନ: କେନ୍ଦୁଝର ଜିଲ୍ଲା ସଦର ବ୍ଲକ ଅନ୍ତର୍ଗତ କେନ୍ଦୁଆ ଠାରେ ଆଜି ନବନିର୍ମିତ କୁଡୁମୀ ବିକାଶ ଭବନର ଶୁଭ ଉଦ୍ଘାଟନ ଉତ୍ସବ ଆଡ଼ମ୍ବରପୂର୍ଣ୍ଣ ପରିବେଶରେ ଅନୁଷ୍ଠିତ ହୋଇଯାଇଛି। କୁଡୁମୀ ସମାଜର ଐତିହ୍ୟ, ପରମ୍ପରା ଓ ସଂସ୍କୃତିର ସଂରକ୍ଷଣ ଏବଂ ଭବିଷ୍ୟତ ପିଢ଼ିଙ୍କ ମଧ୍ୟରେ ଏହାର ପ୍ରସାରକୁ ନେଇ ଆୟୋଜିତ ଏହି କାର୍ଯ୍ୟକ୍ରମରେ ସମାଜର ବହୁ ବିଶିଷ୍ଟ ବ୍ୟକ୍ତି ଓ ସଦସ୍ୟମାନେ ଯୋଗଦେଇଥିଲେ।

କାର୍ଯ୍ୟକ୍ରମରେ ପୂର୍ବତନ ବିଜେପି ଜିଲ୍ଲା ସଭାପତି ରାଧାକୃଷ୍ଣ ମହାନ୍ତ ମୁଖ୍ୟ ଅତିଥି ଭାବେ ଯୋଗଦେଇ କୁଡୁମୀ ସମାଜର ଐକ୍ୟ ଓ ସାଂସ୍କୃତିକ ଚେତନାକୁ ଆହୁରି ସୁଦୃଢ଼ କରିବା ପାଇଁ ଏହି ବିକାଶ ଭବନ ଏକ ମାଇଲଖୁଣ୍ଟ ହେବ ବୋଲି ମତ ପ୍ରକାଶ କରିଥିଲେ। ସେ କହିଥିଲେ ଯେ, ଏଭଳି ଅନୁଷ୍ଠାନ ଓ ଭିତ୍ତିଭୂମି ସମାଜର ସାମୂହିକ ବିକାଶ ଓ ସଂଗଠନକୁ ନୂଆ ଦିଗ ପ୍ରଦାନ କରିଥାଏ।

ସମ୍ମାନିତ ଅତିଥି ଭାବେ ହୃଷୀକେଶ ମହାନ୍ତ, ମନ୍ମଥ ମହାନ୍ତ ଏବଂ ବିରେନ୍ଦ୍ର ମହାନ୍ତ ଉପସ୍ଥିତ ରହି କୁଡୁମୀ ସମାଜର ଇତିହାସ, ପରମ୍ପରା ଓ ସାମାଜିକ ଏକତା ଉପରେ ନିଜ ମତ ରଖିଥିଲେ। ସେମାନେ ଯୁବପିଢ଼ିଙ୍କୁ ନିଜ ଭାଷା, ସଂସ୍କୃତି ଓ ରୀତିନୀତି ସହ ଯୋଡ଼ି ରହିବା ପାଇଁ ଆହ୍ୱାନ ଦେଇଥିଲେ।

ଏହି ଅବସରରେ କୁଡୁମୀ ସେନାର ରାଜ୍ୟ ସମ୍ପାଦକ ବିଶ୍ୱଜିତ ମହାନ୍ତ, ପୂର୍ଣ୍ଣେନ୍ଦୁ ମହାନ୍ତ, ପୁରୁଷୋତ୍ତମ ମହାନ୍ତ, ବିଶିଷ୍ଟ କୁଡୁମୀ ଗବେଷକ ନବ କିଶୋର ମହାନ୍ତ, ଝୁମର କଣ୍ଠଶିଳ୍ପୀ ଭୈରବ ମହାନ୍ତ ଏବଂ ସଦର ବ୍ଲକ କୁଡୁମୀ ସେନାର ସଭାପତି ରଘୁନାଥ ମହାନ୍ତ ପ୍ରମୁଖ ମଞ୍ଚାସୀନ ଥିଲେ।

ବକ୍ତାମାନେ ନିଜ ଅଭିଭାଷଣରେ କହିଥିଲେ ଯେ, ଆଧୁନିକତାର ପ୍ରଭାବ ମଧ୍ୟରେ ଅନେକ ପାରମ୍ପରିକ କଳା, ଲୋକଗୀତ ଓ ଲୋକସଂସ୍କୃତି ଧୀରେ ଧୀରେ ଲୋପ ପାଇବାକୁ ବସିଛି। ତେଣୁ କୁଡୁମୀ ସମାଜର ସମୃଦ୍ଧ ସାଂସ୍କୃତିକ ଐତିହ୍ୟକୁ ସଂରକ୍ଷଣ କରିବା ସହ ଏହାକୁ ନୂତନ ପିଢ଼ିଙ୍କ ନିକଟରେ ପହଞ୍ଚାଇବା ଆଜିର ସମୟର ଆବଶ୍ୟକତା। କୁଡୁମୀ ବିକାଶ ଭବନ ଆଗାମୀ ଦିନରେ ସମାଜର ବିଭିନ୍ନ ସାଂସ୍କୃତିକ, ଶିକ୍ଷାଗତ ଓ ସାମାଜିକ କାର୍ଯ୍ୟକ୍ରମର କେନ୍ଦ୍ରସ୍ଥଳ ପାଲଟିବ ବୋଲି ଆଶା ପ୍ରକାଶ କରାଯାଇଥିଲା।

କାର୍ଯ୍ୟକ୍ରମରେ ବହୁ ସଂଖ୍ୟକ କୁଡୁମୀ ସମାଜର ସଦସ୍ୟ, ବୁଦ୍ଧିଜୀବୀ, ଯୁବକ ଓ ମହିଳାମାନେ ଯୋଗଦେଇଥିଲେ। ଉଦ୍ଘାଟନ ପରେ ସାଂସ୍କୃତିକ ପରିବେଶ ମଧ୍ୟରେ କୁଡୁମୀ ସମାଜର ଏକତା, ଉନ୍ନତି ଓ ସଂସ୍କୃତିର ବିକାଶ ପାଇଁ ସମସ୍ତେ ମିଳିତ ଭାବେ କାର୍ଯ୍ୟ କରିବାକୁ ସଂକଳ୍ପ ନେଇଥିଲେ।
(ଖଣ୍ଡାଧାର ନିଉଜ- କମଳଲୋଚନ ମହାନ୍ତ ଙ୍କ ରିପୋର୍ଟ)