ଶ୍ରାବଣର ଲୁହ - ବନସ୍ମିତା ବେହେରା ପଣ୍ଡା ଙ୍କ ଦ୍ଵାରା ସ୍ବରଚିତ କବିତା।

ଶ୍ରାବଣର ଲୁହ

ବନସ୍ମିତା ବେହେରା ପଣ୍ଡା

କୁନ୍ଦଳ, ଚଣ୍ଡିଖୋଲ, ଯାଜପୁର

9937940863

::::::::::::::::::::::::::::

ଶ୍ରାବଣର ଲୁହ ଝରେ ନିରବ ନିଶୀଥେ,

ମେଘର ଅନ୍ତରେ ଲୁଚିଥିବା ବେଦନାର ଗାଥା ହୋଇ।



ଆକାଶର ଅବ୍ୟକ୍ତ ଆର୍ତ୍ତନାଦ

ବର୍ଷାବିନ୍ଦୁ ସାଜି ଧରା ବକ୍ଷେ ବିଛୁରିତ ହୁଏ।



ବିଜୁଳିର କ୍ଷଣିକ ଦୀପ୍ତିରେ

ଦେଖାଯାଏ ସ୍ମୃତିର ଧ୍ୱଂସସ୍ତୂପ,

ଯେଉଁଠି ଅପୂର୍ଣ୍ଣ ସ୍ୱପ୍ନମାନେ

ନିୟତିର ନିଷ୍ଠୁର ପ୍ରହାରେ ନିଃଶ୍ୱାସ ତ୍ୟାଗ କରିଛନ୍ତି।



ଶ୍ରାବଣର ଲୁହ କେବଳ ଜଳ ନୁହେଁ,

ଏହା ଅବଦମିତ ଅଭିଳାଷର ଅଶ୍ରୁଧାରା,

ବିରହର ଅଗ୍ନିଗର୍ଭ ଯନ୍ତ୍ରଣା,

ଅନନ୍ତ ପ୍ରତୀକ୍ଷାର ନିର୍ବାକ ସାକ୍ଷ୍ୟ।



ପ୍ରତିଟି ବର୍ଷାବିନ୍ଦୁରେ ଲେଖାଅଛି

ହୃଦୟର ଅବ୍ୟକ୍ତ କ୍ରନ୍ଦନ,

ପ୍ରତିଟି ମେଘଗର୍ଜନରେ ଶୁଣାଯାଏ

ସମୟର ନିର୍ମମ ଉପହାସ।



ତଥାପି ଶ୍ରାବଣ କାନ୍ଦେ,

କାରଣ ତା'ର ଲୁହରେ ଜନ୍ମ ନିଏ ନବ ସୃଷ୍ଟି,

ବେଦନାର ଗର୍ଭରୁ ଫୁଟିଉଠେ ଆଶାର କୁସୁମ,

ଏବଂ ଅନ୍ଧକାରର ଅନ୍ତରାଳରୁ

ଉଦିତ ହୁଏ ଜୀବନର ନୂତନ ପ୍ରଭାତ।



ସୌଜନ୍ୟ ଖଣ୍ଡାଧାର ନିଉଜ।