लोणार पोलीससाठी नॅशनल अँटी करप्शन कमिटीची नि:शुल्क बंदोबस्त सेवा

लोणार : नॅशनल अँटी करप्शन अँड ऑपरेशन कमिटी ऑफ इंडियाने लोणार पोलीस स्टेशनला नि:शुल्क बंदोबस्त सेवा देण्याची तयारी दर्शविली आहे. जिल्हा युवा अध्यक्ष दीपक शिवाजी कायंदे यांनी पोलीस निरीक्षकांना निवेदन दिले आहे. शहर व तालुक्यात वाढत्या धार्मिक, सामाजिक व सार्वजनिक कार्यक्रमांमुळे पोलीस प्रशासनाला अतिरिक्त ताण येत असल्याने, या संस्थेचे प्रशिक्षित युवक स्वयंसेवक गर्दी नियंत्रण, वाहतूक नियमन आणि आपत्कालीन मदतीसाठी सज्ज आहेत.

संस्थेचे मुख्य उद्दिष्ट पोलीस प्रशासनाचे काम सुलभ करणे आणि नागरिकांच्या सुरक्षिततेला प्राधान्य देणे आहे. दीपक कायंदे म्हणाले की, युवक स्वयंसेवक कोणत्याही मोबदल्याशिवाय सेवा देण्यासाठी तयार असून, विविध उत्सव, मिरवणुका आणि सार्वजनिक कार्यक्रमांमध्ये पोलीस प्रशासनाची परवानगी मिळाल्यास ते सहभागी होतील. या उपक्रमाला विविध सामाजिक संघटनांकडून सकारात्मक प्रतिसाद मिळाल्याचेही नमूद करण्यात आले आहे.