कल्याणसातारा बस वाहतुकीतील गैरसोयीमुळे प्रवाशांमध्ये संतापछत्रपती संघटना महाराष्ट्र राज्याची परिवहन विभागाकडे तातडीची मागणी

कल्याणसातारा बस वाहतुकीतील गैरसोयीमुळे प्रवाशांमध्ये संताप
छत्रपती संघटना महाराष्ट्र राज्याची परिवहन विभागाकडे तातडीची मागणी
प्रतिनिधी / शेखर जाधव
कल्याण ते सातारा गावाकडे जाणाऱ्या एस.टी. बससेवेतील वाढत्या गैरसोयीमुळे प्रवाशांमध्ये तीव्र संताप व्यक्त होत आहे. नियमित बस वेळेत न येणे, अचानक फेऱ्या रद्द होणे, तसेच अपुरी बस व्यवस्था यामुळे हजारो प्रवाशांना मोठ्या अडचणींचा सामना करावा लागत असल्याची माहिती समोर आली आहे.
या पार्श्वभूमीवर छत्रपती संघटना महाराष्ट्र राज्य यांच्या वतीने संबंधित परिवहन विभागाकडे तीव्र नाराजी व्यक्त करण्यात आली आहे. संघटनेने प्रवाशांच्या समस्या तातडीने सोडवण्याची मागणी केली असून, अन्यथा आंदोलन छेडण्याचा इशाराही दिला आहे.
विशेषतः कामगार, विद्यार्थी, महिला आणि ज्येष्ठ नागरिकांना वेळेवर प्रवास करता येत नसल्याने त्यांचे आर्थिक तसेच मानसिक नुकसान होत असल्याचे प्रवाशांनी सांगितले. अनेक प्रवाशांना बसस्थानकांवर तासन्तास प्रतीक्षा करावी लागत असून, गर्दीमुळे प्रवास अत्यंत त्रासदायक बनला आहे.
कल्याणसातारा मार्गावरील काही बसफेऱ्या कोणतीही पूर्वसूचना न देता रद्द होत असल्याने प्रवाशांची गैरसोय अधिक वाढत आहे. सणासुदीच्या काळात तसेच सुट्ट्यांच्या दिवशी प्रवाशांची संख्या मोठ्या प्रमाणात वाढत असतानाही अतिरिक्त बसफेऱ्यांची व्यवस्था करण्यात येत नसल्याची नाराजी व्यक्त होत आहे.
यासंदर्भात संघटनेने परिवहन विभागाकडे खालील प्रमुख मागण्या केल्या आहेत :
कल्याणसातारा मार्गावर तात्काळ अतिरिक्त बसफेऱ्या सुरू कराव्यात
बसचे वेळापत्रक नियमित व पारदर्शक ठेवावे
प्रवाशांना बस रद्द किंवा उशीराबाबत पूर्वसूचना द्यावी
महिला, विद्यार्थी व ज्येष्ठ नागरिकांसाठी विशेष सुविधा उपलब्ध कराव्यात
गर्दीच्या वेळेत विशेष बससेवा सुरू करावी
प्रवाशांच्या समस्यांकडे दुर्लक्ष झाल्यास तीव्र आंदोलन छेडण्यात येईल, असा इशारा छत्रपती संघटना महाराष्ट्र राज्य यांच्या पदाधिकाऱ्यांनी दिला आहे.