महाराष्ट्र सरकारची भजनी मंडळांना आर्थिक मदत योजना

महाराष्ट्र: महाराष्ट्र शासनाच्या सांस्कृतिक कार्य विभागाद्वारे राज्यातील लोककला आणि भजन परंपरा जपण्यासाठी 'भजनी मंडळ अनुदान योजना' राबवली जाते. या योजनेअंतर्गत ग्रामीण व शहरी भागातील भजनी मंडळांना भजनासाठी लागणारी वाद्ये व साहित्य खरेदी करण्यासाठी आर्थिक मदत केली जाते. निवड झालेल्या मंडळांना साधारण ₹२५,००० इतके एकरकमी अनुदान दिले जाते, जे नवीन वाद्ये खरेदी किंवा जुन्या वाद्यांच्या दुरुस्तीसाठी वापरता येते.

योजनेची पात्रता निकषांमध्ये भजनी मंडळाचे धर्मादाय आयुक्त कार्यालयाकडे नोंदणी असणे किंवा स्थानिक स्वराज्य संस्थेचे शिफारस पत्र असणे आवश्यक आहे. मंडळ सातत्याने भजन किंवा कीर्तनाचे कार्यक्रम करत असावे आणि त्यात किमान १० ते १५ सदस्य असावेत. लाभ घेण्यासाठी मंडळांनी नोंदणी प्रमाणपत्र, बँक पासबुकची झेरॉक्स, अध्यक्ष/सचिवाचा आधार कार्ड आणि भजन कार्यक्रमांचे फोटो अथवा पुरावे जिल्हाधिकारी कार्यालयात सादर करणे गरजेचे आहे.