🚨ફતેપુરાના કંકાસિયા પાસે અકસ્માત: 108 સ્ટાફની "પહેલા પોલીસ કેસ"ની જીદ સામે જનતામાં રોષ

📢ફતેપુરાના કંકાસિયા પાસે અકસ્માત: 108 સ્ટાફની "પહેલા પોલીસ કેસ"ની જીદ સામે જનતામાં રોષ
ફતેપુરા:
દાહોદ જિલ્લાના ફતેપુરા તાલુકાના કંકાસિયા બસ સ્ટેન્ડ પાસે રિક્ષા પલટી ખાવાના ગમખ્વાર અકસ્માતમાં 108 એમ્બ્યુલન્સ સેવાના સ્ટાફની માનવતાવિહોણી બેદરકારી સામે આવી છે. અકસ્માતમાં ઈજાગ્રસ્ત થયેલા 4 થી 5 મુસાફરોની સ્થિતિ જોઈ સ્થાનિક લોકોએ તાત્કાલિક 108 બોલાવી હતી, પરંતુ ઘટનાસ્થળે પહોંચેલા સ્ટાફે સારવાર આપવાને બદલે "પોલીસ કેસ"ની પ્રક્રિયાનો આગ્રહ રાખતા મામલો ગરમાયો હતો.
લોકરોષ બાદ મળી સારવાર
અકસ્માતના સમયે જ્યારે મુસાફરો લોહીલુહાણ હાલતમાં મદદની પોકાર કરી રહ્યા હતા, ત્યારે 108ના સ્ટાફે એવું કહીને હાથ અદ્ધર કરી લીધા હતા કે, "આ તો પોલીસ કેસ છે, પહેલા પોલીસ કાર્યવાહી કરવી પડશે." સ્ટાફની આ વાત સાંભળી હાજર સ્થાનિક લોકો લાલઘૂમ થઈ ગયા હતા. ગ્રામજનોએ આક્રોશ વ્યક્ત કરતા જણાવ્યું હતું કે, "કોઈપણ ઈમરજન્સીમાં સૌથી પહેલું પ્રાધાન્ય માનવ જીવ બચાવવાનું અને પ્રાથમિક સારવાર આપવાનું હોવું જોઈએ, નહીં કે કાયદાકીય ગૂંચવણોનું."
સ્થાનિકોના દબાણ અને ઉગ્ર રજૂઆત બાદ આખરે 108નો સ્ટાફ ઈજાગ્રસ્તોને નજીકના દવાખાને લઈ જવા માટે સંમત થયો હતો.
🚨📢તંત્ર સામે સવાલો
ગુજરાતની જીવાદોરી સમાન ગણાતી 108 ઈમરજન્સી સેવા સામાન્ય રીતે ત્વરિત મદદ માટે જાણીતી છે. પરંતુ આ કિસ્સામાં સ્ટાફ દ્વારા દર્દીની ગંભીરતાને બદલે પોલીસ કેસને મહત્વ આપવાની ઘટનાએ તંત્રની કામગીરી પર સવાલો ઉભા કર્યા છે. શું કોઈ ગંભીર અકસ્માતમાં મુસાફરનો જીવ પોલીસની રાહ જોવામાં જતો રહેવો જોઈએ? તેવો પ્રશ્ન કંકાસિયાના લોકો પૂછી રહ્યા છે.
📝Ripot:Aima media Hemant damor