अमरापूर येथे शेतात आढळले बिबट्याचे मृत पिल्लू; परिसरात घबराट

शेवगाव (प्रतिनिधी):
अहमदनगर जिल्ह्यातील शेवगाव तालुक्यातील अमरापूर येथे आज दुपारी एक खळबळजनक घटना उघडकीस आली आहे. गावातील माजी सरपंच विजय पोटफोडे यांच्या शेतात बिबट्याचे एक पिल्लू (बचडे) मृत अवस्थेत आढळून आले. या घटनेमुळे संपूर्ण परिसरात भीतीचे वातावरण पसरले आहे.
आज दुपारी विजय पोटफोडे यांच्या शेतात काम सुरू असताना बिबट्याचे पिल्लू निपचित पडलेले दिसून आले. जवळ जाऊन पाहिले असता ते मृत असल्याचे स्पष्ट झाले. या माहितीची वाऱ्यासारखी बातमी गावात पसरताच ग्रामस्थांनी मोठ्या संख्येने शेताकडे धाव घेतली. लोकवस्तीच्या जवळच बिबट्याचे पिल्लू आढळल्याने, परिसरात पूर्ण वाढ झालेला बिबट्या किंवा मादी बिबट्याचा वावर असण्याची शक्यता वर्तवण्यात येत आहे. यामुळे शेतकऱ्यांमध्ये आणि मजुरांमध्ये भीतीचे सावट आहे.
घटनेची माहिती मिळताच वनविभागाच्या अधिकाऱ्यांनी आणि कर्मचाऱ्यांनी तातडीने घटनास्थळी धाव घेतली. वनविभागाच्या पथकाने मृत पिल्लाचा ताबा घेऊन रितसर पंचनामा केला आहे.
"आम्ही घटनास्थळी पोहोचून पंचनामा केला आहे. पिल्लाचा मृत्यू नेमका कशामुळे झाला, हे शवविच्छेदन अहवालानंतरच स्पष्ट होईल. ग्रामस्थांनी घाबरून न जाता सतर्क राहावे," अशी माहिती वनविभागाच्या अधिकाऱ्यांनी दिली आहे.
पिल्लाचा मृत्यू भूकेमुळे, आजारपणामुळे झाला की अन्य काही कारणाने, याचा शोध वनविभाग घेत आहे. तसेच, परिसरात मादी बिबट्या असण्याची शक्यता गृहीत धरून वनविभागाकडून गस्त वाढवण्याची मागणी ग्रामस्थांनी केली आहे.