ଶବଦାହ ସଂସ୍କାର କରିବା ଯାହାର ନିଶା!

"ଶବଦାହ ସଂସ୍କାର କରିବା ଯାହାର ନିଶା!"

କେନ୍ଦୁଝର ଜିଲ୍ଲା ସଦରମହକୁମା ସ୍ଥିତ କେନ୍ଦୁଝର ସହରର ସର୍ବସାଧାରଣ ଙ୍କ ନିମନ୍ତେ ସେବା ପ୍ରଦାନ କରୁଥିବା କେନ୍ଦୁଝର ଗଡ଼ ପୌରପାଳିକା ୱାର୍ଡ ନମ୍ବର ୬ ଅନ୍ତର୍ଗତ ଧାଙ୍ଗଡପଡା ସନ୍ନିକଟ "ଆଦର୍ଶ ଶ୍ମଶାନ" ରେ ନିୟୋଜିତ ସେବକ ଶ୍ରୀ ସିଦ୍ଧେଶ୍ଵର ନାଏକ ଙ୍କ ସମ୍ପର୍କରେ ସଂକ୍ଷିପ୍ତ ଆଲୋକପାତ।

ଚଳିତ ଏପ୍ରିଲ୍ ମାସ ୨୪ ତାରିଖରେ ରାତ୍ରି ୮ ଟାରେ ୱାର୍ଡ ନମ୍ବର ୮ ଅନ୍ତର୍ଗତ ଗୌରତୋଟା ସାହି ନିବାସୀ ସ୍ବର୍ଗତଃ ପର୍ଶୁ ନାଏକ ଙ୍କ ମରଶରୀରକୁ ଆଦର୍ଶ ଶ୍ମଶାନରେ ଶବଦାହ ସଂସ୍କାର କରାଯିବା ସମୟରେ ସିଦ୍ଧେଶ୍ଵର ନାଏକ ଓରଫ ସିଦ୍ଧୁ ଙ୍କ ସହିତ କିଛି ସୌଜନ୍ୟ ମୂଳକ ଆଲୋଚନା ଏଠାରେ ପ୍ରକାଶିତ କରାଯାଇଛି।

ସିଦ୍ଧେଶ୍ଵର ନାଏକ ଓରଫ ସିଦ୍ଧୁ ୧୯୯୨ ମସିହାରେ ଯୁବକ ବୟସରେ କେନ୍ଦୁଝର ଗଡ଼ ପୌରପାଳିକା କୁ ତାଙ୍କର ୱାର୍ଡ ରୁ କାଉନସିଲର ରୂପରେ ନିର୍ବାଚନ ହୋଇ ଲୋକଙ୍କୁ ନିସ୍ବାର୍ଥପର ସେବା ଯୋଗାଇଥିଲେ। ବର୍ତ୍ତମାନ ସିଦ୍ଧେଶ୍ଵର ଙ୍କର ବୟସ ପ୍ରାୟତଃ ୬୦ବର୍ଷ ପାଖାପାଖି ହେଲାଣି। ଏହି ବୟସରେ ମଧ୍ଯ ସିଦ୍ଧେଶ୍ଵର ନିଷ୍ଠା ଓ ଶ୍ରଦ୍ଧାର ସହିତ ଶବଦାହ ସଂସ୍କାର ସେବା ପ୍ରଦାନ କରୁଥିବା ଦେଖିବାକୁ ମିଳୁଅଛି। ଅଦ୍ୟାବଧି ପ୍ରାୟତଃ ୧୫୦୦ରୁ ଉର୍ଦ୍ଧ୍ବ ଶବଦାହ ସଂସ୍କାର କରିଥିବା ସିଦ୍ଧେଶ୍ଵର ନାଏକ ଙ୍କ ଠାରୁ ଜାଣିବା ପାଇଁ ମିଳେ। ସିଦ୍ଧେଶ୍ଵର ଙ୍କ କରିବା କଥା- ଭଗବାନଙ୍କ ଦୟାରୁ ମୋତେ ଶବଦାହ କରିବା ପାଇଁ ଏହି ଜନ୍ମରେ ସୁଯୋଗ ଦେଇଥିବା ହେତୁ ଭଗବାନଙ୍କୁ କୋଟି କୋଟି ଧନ୍ଯବାଦ ଅର୍ପଣ କରୁଅଛି। ସିଏ ଏକଥା ମଧ୍ଯ କହିଛନ୍ତି; ମୋର ମରଣଶୀଳ ଶରୀରକୁ କିଏ ଦାହ ସଂସ୍କାର କରିବ? ତାହା ମୋତେ ଅଜଣା! କିନ୍ତୁ ମୁଁ, ଲୋକଙ୍କୁ ବିନାମୂଲ୍ୟରେ ନିସ୍ବାର୍ଥପର ସେବା ପ୍ରଦାନ କରୁଥିବି! କେନ୍ଦୁଝର ଗଡ଼ ପୌରପାଳିକା ତରଫରୁ ଭରସା ଓ ବିଶ୍ବାସର ସହିତ ୨୦୧୩ ମସିହାରେ ମୋତେ ଏହି ପବିତ୍ର "ଆଦର୍ଶ ଶ୍ମଶାନ"ରେ ଲୋକଙ୍କୁ ନିସ୍ବାର୍ଥପର ସେବା ପ୍ରଦାନ କରିବା ପାଇଁ ନିୟୋଜିତ କରାଯାଇଛି। ଅଦ୍ୟାବଧି ବିଭିନ୍ନ ପ୍ରାନ୍ତରରୁ ଆସୁଥିବା ଲୋକଙ୍କର ଆତ୍ମୀୟସ୍ବଜନ ମାନଙ୍କ ଶବଦାହ ସଂସ୍କାର ନିଃଶୁଳ୍କ ଓ ନିସ୍ବାର୍ଥପର ସେବା କରିଆସୁଛି। ଶେଷନିଃଶ୍ଵାସ ତ୍ଯାଗ ପର୍ଯ୍ୟନ୍ତ ଲୋକଙ୍କୁ ନିସ୍ବାର୍ଥପର ସେବା ପ୍ରଦାନ କରିବାରେ କୌଣସି ପ୍ରକାରର ଅବହେଳିତ କରିବି ନାହିଁ ବୋଲି ସିଦ୍ଧେଶ୍ଵର ନାଏକ ସ୍ପଷ୍ଟ ମତଦେଇଥିଲେ।

ସିଦ୍ଧେଶ୍ଵର ନାଏକ ଙ୍କର ସରକାରୀ କଣ୍ଟ୍ରୋଲ ଦୋକାନରେ ମଧ୍ଯ ଲୋକଙ୍କୁ ସେବା ପ୍ରଦାନ କରୁଥିବା କଥା କହିଛନ୍ତି। ସେଥିରେ ମଧ୍ଯ ଉପଭୋକ୍ତା ମାନଙ୍କୁ କୌଣସି ପ୍ରକାରର ଅବହେଳିତ କରିନାହାଁନ୍ତି। ସେହିଥିରେ କିଛି ଅର୍ଥ ଉପାର୍ଜିତ ହୁଏ, କିନ୍ତୁ ଶବଦାହ ସଂସ୍କାର ବାବଦରେ କାହାଠାରୁ କିଛି ଅର୍ଥ ଗ୍ରହଣ କରନ୍ତି ନାହିଁ। କୌଣସି ଦୁଃଖୀ, ଦରିଦ୍ର, ଅବହେଳିତ, ଅପରିଚିତ ବ୍ଯକ୍ତି ବିଶେଷଙ୍କର ଶବଦାହ ସଂସ୍କାର ବାବଦରେ ଅର୍ଥାଭାବରୁ ଯେପରି ଅବହେଳିତ ନହୁଏ; ସେଥିପାଇଁ ବିଶେଷ ଧ୍ଯାନ ଦେଇଥାଏ ଏବଂ ମୋର ଚିହ୍ନା ପରିଚିତ ସାଙ୍ଗସାଥୀ ଓ ଭଦ୍ରଲୋକଙ୍କ ଠାରୁ ଆବଶ୍ଯକ ପରିମାଣର ଅର୍ଥ ଖର୍ଚ୍ଚ କରି ଶବଦାହ ସଂସ୍କାର ପ୍ରଦାନ କରିଦେଇଛି ବୋଲି ସିଦ୍ଧେଶ୍ଵର କୁହନ୍ତି। ଯେଉଁମାନେ ଅନ୍ୟାନ୍ୟ ସ୍ଥାନ ରେ ଶବଦାହ ସଂସ୍କାର ସେବା ଯୋଗାଇଦେବାକୁ ଡାକନ୍ତି, ସେହି ସ୍ଥାନକୁ ଯାଇ ନିସ୍ବାର୍ଥପର ସେବା ପ୍ରଦାନ କରେ, କିନ୍ତୁ କାହାଠାରୁ କିଛି ଅର୍ଥ ଗ୍ରହଣ କରେନାହିଁ ବୋଲି ସିଦ୍ଧେଶ୍ଵର କୁହନ୍ତି।

ଯେତେବେଳେ କୋଭିଡ ମହାମାରୀ ସାରା ବିଶ୍ବରେ ଭୟାବହତା ବ୍ୟାପିବାରେ ଲାଗିଥାଏ। ସେତେବେଳେ କୋଭିଡ ସଂକ୍ରମଣରେ ମରିଥିବା ଲୋକଙ୍କର ଶବଦାହ ସଂସ୍କାର ନିର୍ଭୟତାର ସହିତ କରିଥିଲି। କିନ୍ତୁ କୌଣସି ବ୍ୟକ୍ତି କୋଭିଡ ସଂକ୍ରମଣରେ ମରିଥିବା ମରଶରୀରକୁ ହତାଦର କିମ୍ବା ଅବମାନନା କରିନାହିଁ। ସସମ୍ମାନେ ସେହିସମୟରେ ସମସ୍ତ କୋଭିଡ ପୀଡିତ ମରଶରୀରକୁ ଅନ୍ତିମ ଶବଦାହ ସଂସ୍କାର ପ୍ରଦାନ କରୁଥିବା କଥା ସିଦ୍ଧେଶ୍ଵର କୁହନ୍ତି।

ସିଦ୍ଧେଶ୍ଵର କୁହନ୍ତି, ଶବଦାହ ସଂସ୍କାର କରିବା ଦ୍ବାରା ମୋତେ ବହୁତ ଶାନ୍ତି ପ୍ରଦାନ କରେ। ଏହା ମୋର ପେଶା ନୁହେଁ, ନିଶା ଅଟେ। ଭଗବାନ! ମୋତେ ଏହି ଜନ୍ମରେ ସୁଯୋଗ ଦେଇଛନ୍ତି, ଲୋକଙ୍କୁ ନିସ୍ବାର୍ଥପର ସେବା ପ୍ରଦାନ କରିବା ପାଇଁ। ଏହା ମୋପାଇଁ ଈଶ୍ବରଙ୍କ ବରଦାନ ତଥା ଆଶୀର୍ବାଦ ବୋଲି ସିଦ୍ଧେଶ୍ଵର କୁହନ୍ତି। ଏହି ନିସ୍ବାର୍ଥପର ସେବା ଯୋଗାଇ ଦେଉଥିବାରୁ ଲୋକଙ୍କ ନିକଟରୁ ଭଲପାଇବା, ସ୍ନେହ, ଶ୍ରଦ୍ଧା ଏବଂ ବଡ ଲୋକଙ୍କ ଠାରୁ ଆଶୀର୍ବାଦ ମିଳୁଅଛି। ଏହାଠାରୁ ମୋତେ ଅଧିକ କଣ ଦରକାର ବୋଲି ସିଦ୍ଧେଶ୍ଵର କୁହନ୍ତି!

ବିଶେଷ ଉପସ୍ଥାପନା: ପୁରୁଷୋତ୍ତମ ପାତ୍ର, କେନ୍ଦୁଝର।