ଓଡ଼ିଶା ସାହିତ୍ୟ ଏକାଡେମୀ ଦ୍ବାରା ପ୍ରାୟୋଜିତ ଅଧିକାଂଶ ସାହିତ୍ୟ ଉତ୍ସବ ଗୁଡ଼ିକରେ ଅବ୍ୟବସ୍ଥା କାହିଁକି!
ଓଡ଼ିଶା ସାହିତ୍ୟ ଏକାଡେମୀ ଦ୍ବାରା ପ୍ରାୟୋଜିତ ଅଧିକାଂଶ ସାହିତ୍ୟ ଉତ୍ସବ ଗୁଡ଼ିକରେ ଅବ୍ୟବସ୍ଥା କାହିଁକି!
ଭୁବନେଶ୍ୱର,୨୫/୦୪ : ( ଖଣ୍ଡାଧାର ନିଉଜ ) ସ୍ଥାନୀୟ ୟୁନିଟ - ୯ ବୁଦ୍ଧ ମନ୍ଦିର ର ନୂତନ ସଭାଗୃହରେ ଓଡିଶା ସାହିତ୍ୟ ଏକାଡେ଼ମୀ, ଭୁବନେଶ୍ଵର ,ଓଡିଶା ଦ୍ବାରା ପ୍ରାୟୋଜିତ ଏବଂ ଓଁମା ଅନୁଷ୍ଠାନ ସାହିତ୍ୟିକ ଓ ପାଠକ ସମାଜ ଭୁବନେଶ୍ବର ଙ୍କ ଆନୁକୂଲ୍ୟରେ ଆୟୋଜିତ ଉତ୍କଳ ଦିବସ ଏବଂ ଓଡ଼ିଆ ପକ୍ଷ ସ୍ମୃତି ସାଂସ୍କୃତିକ ମହୋତ୍ସବ - ୨୦୨୬ର ଆଲୋଚନା ଚକ୍ର ଓ ସମ୍ବର୍ଦ୍ଧନା ପର୍ବରେ ଘୋର ଅବ୍ୟବସ୍ଥା ଦେଖିବାକୁ ମିଳିଛି। ପ୍ରଥମତଃ ନିମନ୍ତ୍ରଣ କାର୍ଡ ରେ ପ୍ରାୟୋଜକ ଓଡିଶା ସାହିତ୍ୟ ଏକାଡେ଼ମୀ ଭୁବନେଶ୍ଵର ର ନାମ ଲିପିବଦ୍ଧ ହୋଇନଥିବା ସ୍ଥଳେ ଅଂଶଗ୍ରହଣକାରୀ ଙ୍କୁ ଦିଆଯାଇଥିବା ପ୍ରମାଣ ପତ୍ରରେ ପ୍ରାୟୋଜକ ଓଡିଶା ସାହିତ୍ୟ ଏକାଡେ଼ମୀ ଭୁବନେଶ୍ଵର ର ନାମ ମୁଦ୍ରଣ କରାଯାଇଛି।
ଦ୍ବିତୀୟତଃ ଦୁଇଟି ପର୍ଯ୍ୟାୟ ଆଲୋଚନା ଚକ୍ରରେ ଏଗାର ଜଣ ଲେଖାଏଁ ଅତିଥି ମଞ୍ଚାସୀନ ହୋଇଥିଲେ ମଧ୍ୟ ଦ୍ବିତୀୟ ପର୍ଯ୍ୟାୟ ଅଧିବେଶନରେ ମାତ୍ର ମୁଖ୍ୟ ବକ୍ତା ଆଲୋଚନା କରିଥିବା ବେଳେ ଅନ୍ୟମାନଙ୍କୁ ଆଲୋଚନା କରିବାକୁ ସୁଯୋଗ ଦିଆଯାଇନଥିଲା।
ତୃତୀୟତଃ ଓଡ଼ିଆ ସାହିତ୍ୟିକ ପରିଚୟ ନାମରେ ଏକ ପୁସ୍ତକ ଉନ୍ମୋଚିତ ହେବାର ଥିଲେ ମଧ୍ୟ ତାହା ଆୟୋଜକ ଙ୍କ ଦ୍ବାରା ହୋଇପାରି ନାହିଁ।
ଚତୁର୍ଥତଃ ଶହେ ଜଣ ବରିଷ୍ଠ ସାହିତ୍ୟିକ ଙ୍କୁ ମାନପତ୍ର ସହ ସମ୍ବର୍ଦ୍ଧନା ଦିଆଯିବାର କାର୍ଯ୍ୟକ୍ରମ ଥିଲେ ମଧ୍ୟ ମାତ୍ର ଦଶ ବାର ଜଣ ( ମଞ୍ଚାସୀନ ଅତିଥି ମାନଙ୍କ ବ୍ୟତୀତ ) ଙ୍କୁ ଅବ୍ୟବସ୍ଥା ଭିତରେ ସମ୍ବର୍ଦ୍ଧିତ କରାଯାଇଥିଲା।ଆଉ କିଛି ସାହିତ୍ୟିକ ଙ୍କୁ କାଗଜ ରୂପୀ ମାନପତ୍ର ଦେଇ ସମ୍ବର୍ଦ୍ଧିତ କରାଯାଇଥିଲା।
ସବୁଠାରୁ ଦୁଃଖ ଓ ପରିତାପର ବିଷୟ ଆୟୋଜକ ଙ୍କ ଦ୍ବାରା ନିମନ୍ତ୍ରିତ ହୋଇ ଓଡ଼ିଶାର ବିଭିନ୍ନ ଦୂର ଦୂରଦୂରାନ୍ତରୁ - ସମ୍ବଲପୁର, କେନ୍ଦ୍ରାପଡ଼ା, କେନ୍ଦୁଝର ଆଦି ଜିଲ୍ଲାର କବି ଗାଳ୍ପିକ ଲେଖକ ମାନେ ଗାଡି ଖର୍ଚ୍ଚ କରି ଏହି ମହୋତ୍ସବକୁ ଆସିଥିଲେ ମଧ୍ୟ ସେମାନଙ୍କୁ ରିକ୍ତ ହସ୍ତରେ ଫେରିବାକୁ ପଡିଛି ଏବଂ ସେମାନଙ୍କ ମଧ୍ୟରେ ଗଭୀର ଅସନ୍ତୋଷ ଦେଖିବାକୁ ମିଳିଛି। କୌତୁହଳର ବିଷୟ ଦ୍ବିତୀୟ ଅଧିବେଶନର ଅତିଥି ମାନଙ୍କ ମଧ୍ୟରେ ସମ୍ବର୍ଦ୍ଧନା ପାଇବା ପାଇଁ ଯେଉଁ ବ୍ୟାକୁଳତା ଦେଖାଦେଲା,ତାହା ସାହିତ୍ୟିକ ମାନଙ୍କ ପାଇଁ ଘୋର ଲଜ୍ୟା ଜନକ ଅଟେ। ସର୍ବୋପରି ଦେଖିବାକୁ ଗଲେ ଉକ୍ତ ସାହିତ୍ୟ ମହୋତ୍ସବ ଟି ସଂପୁର୍ଣ୍ଣ ଭାବରେ ସାହିତ୍ୟିକ ମାନଙ୍କ ପ୍ରତି ଆୟୋଜକ ଙ୍କ ତାତ୍ସଲ୍ୟ ଓ ହେୟ ମନୋଭାବର ପରିଚୟ ଦେଇଛି କହିଲେ ଅତ୍ୟୁକ୍ତି ହେବ ନାହିଁ।
ଭବିଷ୍ୟତରେ ଓଡ଼ିଶା ସାହିତ୍ୟ ଏକାଡେମୀ ତରଫରୁ ଏହିପରି ମହନୀୟ କାର୍ଯ୍ୟକ୍ରମ ଆୟୋଜନ କରାଗଲେ ଓଡ଼ିଶାର ବିଭିନ୍ନ ଅଞ୍ଚଳରେ ଓଡ଼ିଆ ଭାଷା ସାହିତ୍ୟ କ୍ଷେତ୍ରରେ କାର୍ଯ୍ୟକ୍ରମ କରୁଥିବା ଦକ୍ଷ ଓ ଜଣାଶୁଣା ସାହିତ୍ୟାନୁଷ୍ଠାନ ମାଧ୍ୟମରେ କରାଗଲେ ଓଡିଶା ସରକାରଙ୍କ ଲକ୍ଷ୍ୟ ଓ ଆଭିମୁଖ୍ୟ ପ୍ରଚାର ପ୍ରସାର ହେବା ସହ ଓଡ଼ିଆ ଭାଷା ସାହିତ୍ୟ, ସଂସ୍କୃତି, ପରମ୍ପରା ତଥା ଐତିହ୍ୟ ର ଶ୍ରୀ ବୃଦ୍ଧି ଘଟନ୍ତା।
ବାବୁଲାଲ ପଲେଇଙ୍କ ରିପୋର୍ଟ।
