ଓଡ଼ିଶାର ଉପମୁଖ୍ୟମନ୍ତ୍ରୀ ଶ୍ରୀ କେ.ଭି. ସିଂହଦେଓଙ୍କ ସହ ଆମେରିକୀୟ କନସୁଲ୍ ଜେନେରାଲଙ୍କ ସୌଜନ୍ୟମୂଳକ ସାକ୍ଷାତକାର,
- ଦ୍ବିପାକ୍ଷିକସମ୍ପର୍କ ଏବଂ ସବୁଜ ଶକ୍ତି ନବସୃଜନ ବିଷୟରେ ଆଲୋଚନା
ଭୁବନେଶ୍ବର : ଆନ୍ତର୍ଜାତୀୟ ସହଯୋଗକୁ ସୁଦୃଢ଼ କରିବା ଦିଗରେ ଏକ ଗୁରୁତ୍ବପୂର୍ଣ ପଦକ୍ଷେପ ସ୍ବରୂପ, ଆମେରିକାର କନସୁଲ୍ ଜେନେରାଲ୍ (Consul General) ମିସ୍ ଲୌରା ଆଜି ଲୋକସେବା ଭବନଠାରେ ମାନ୍ୟବର ଉପମୁଖ୍ୟମନ୍ତ୍ରୀ ଶ୍ରୀ କନକ ବର୍ଦ୍ଧନ ସିଂହଦେଓଙ୍କୁ ସୌଜନ୍ୟମୂଳକ ସାକ୍ଷାତ କରିଛନ୍ତି। ଏହି ସାକ୍ଷାତରେ ଅକ୍ଷୟ ଶକ୍ତି, ସେମିକଣ୍ଡକ୍ଟର ନିର୍ମାଣ ଏବଂ ଓଡ଼ିଶାର ସମୃଦ୍ଧ ପର୍ଯ୍ୟଟନ ଓ ସାଂସ୍କୃତିକ ଐତିହ୍ୟର ପ୍ରସାର ଭଳି ପ୍ରମୁଖ କ୍ଷେତ୍ରଗୁଡ଼ିକ ଉପରେ ଆଲୋଚନା କରାଯାଇଥିଲା।ଏହି ଆଲୋଚନାର ମୁଖ୍ୟ ବିଷୟବସ୍ତୁ ଥୂଲା ସ୍ଥାୟୀ ଶକ୍ତି ଆଡ଼କୁ ପରିବର୍ତ୍ତନ।
ଉପମୁଖ୍ୟମନ୍ତ୍ରୀ ଶ୍ରୀ ସିଂହଦେଓ ଅକ୍ଷୟ ଶକ୍ତି ଏବଂ ପମ୍ପଡ୍ ଷ୍ଟୋରେଜ୍ ପ୍ରକଳ୍ପ (PSPs) କ୍ଷେତ୍ରରେ ଓଡ଼ିଶାର ବର୍ଷିତ କାର୍ଯ୍ୟପ୍ରଣାଳୀ ଉପରେ ଆଲୋକପାତ କରିଥିଲେ। ଶକ୍ତି ସଞ୍ଚୟ ପାଇଁ ବ୍ୟାଟେରୀ ଏନର୍ଜି ଷ୍ଟୋରେଜ୍ ସିଷ୍ଟମ୍ (BESS)ର କାର୍ଯ୍ୟକାରିତା ଉପରେ ଆଲୋଚନା ହୋଇଥିଲା। ପିକ୍ ସମୟରେ ବିଦ୍ୟୁତ୍ ଉପଲବ୍ଧତା ନିଶ୍ଚିତ କରିବା ପାଇଁ ପ୍ରତ୍ୟେକ ଗ୍ରୀଡ୍ ସିଷ୍ଟମ୍ ଏବଂ ସୌର ପ୍ରକଳ୍ପରେ ବ୍ୟାଟେରୀ ଷ୍ଟୋରେଜ୍କୁ ସାମିଲ କରିବା ଉପରେ ଉପମୁଖ୍ୟମନ୍ତ୍ରୀ ଗୁରୁତ୍ୱ ଦେଇଥିଲେ।
ସେମିକଣ୍ଡକ୍ଟର ଏବଂ ଡିଜିଟାଲ୍ ଭିତ୍ତଭୂମିରେ, ରାଜ୍ୟରେ ଭାରତର ପ୍ରଥମ 3D ଗ୍ଲାସ ସେମିକଣ୍ଡକ୍ଟର ଚିପ୍ ନିର୍ମାଣ ପ୍ରୟାସ ଉପରେ ଆଲୋଚନା ହୋଇଥିଲା। ଏଥିସହ ଡାଟା ସେଣ୍ଟର ସ୍ଥାପନ ଏବଂ ଡିଜିଟାଲ୍ବ୍ୟବସ୍ଥାର ଆଧୁନିକୀକରଣ ପାଇଁ ଭୂତଳ କେବୁଲ୍ ବିଛାଇବା ଯୋଜନା ଉପରେ ମଧ୍ୟ ଆଲୋକପାତ କରାଯାଇଥିଲା। ଓଡ଼ିଶା ଉପକୂଳରେ ମିଳୁଥିବା ଦୁର୍ଲଭ ଖଣିଜ ସମ୍ପଦର ଅନ୍ବେଷଣ ବିଷୟରେ ମଧ୍ୟ ଆଲୋଚନା ହୋଇଥିଲା।
ଶିଳ୍ପ ଅଭିବୃଦ୍ଧି ଏବଂ ପୁଞ୍ଜିନିବେଶ ନିମନ୍ତେ ଅଞ୍ଚଳର ଯୋଗାଣ ଶୃଙ୍ଖଳା ଏବଂ ଲଜିଷ୍ଟିକ୍ସ ପରିଚାଳନା କ୍ଷମତା, ଓଡ଼ିଶାର ଉଦ୍ୟୋଗୀ ପ୍ରତିଭାକୁ ସୁଦୃଢ଼ କରିବା ପାଇଁ ପରିପକ୍ବ ଷ୍ଟାର୍ଟଅପ୍ ଗୁଡ଼ିକ ପାଇଁ ପାଣ୍ଠି ଯୋଗାଡ଼ ଉପରେ ମଧ୍ୟ ଆଲୋଚନା ହୋଇଥିଲା।କନସୁଲ ଜେନେରାଲ ଓଡ଼ିଶାର ସହନଶୀଳତା, ବିଶେଷ କରି ସାମୁଦ୍ରିକ ବାତ୍ୟା ପରେ ରାଜ୍ୟର ଅଦ୍ଭୁତପୂର୍ବ ବିଦ୍ୟୁତ୍ ବିତରଣ ଏବଂ ପୁନରୁଦ୍ଧାର କାର୍ଯ୍ୟର ପ୍ରଶଂସା କରିଥିଲେ। ପର୍ଯ୍ୟଟନ ଏବଂ ଦ୍ବିପାକ୍ଷିକ ସାଂସ୍କୃତିକ ବିନିମୟକୁ ପ୍ରୋତ୍ସାହିତ କରିବା ପାଇଁ ଉପମଖ୍ୟମନୀ ଓଡିଶାର ଜାତୀୟଉଦ୍ୟାନ ଏବଂ ବନ୍ୟପ୍ରାଣୀ ଅଭୟାରଣ୍ୟ, ଜାତୀୟ କ୍ରୀଡ଼ାକୁ ପ୍ରୋତ୍ସାହିତ କରିବାରେ ରାଜ୍ୟର ସକ୍ରିୟ ଭୂମିକା ବିଷୟରେ ତଥ୍ୟ ଉପସ୍ଥାପନ କରିଥିଲେ।ଏହି ସୌଜନ୍ୟମୂଳକ ସାକ୍ଷାତକାର ଅବସରରେ ମୁଖ୍ୟ କନସୁଲଙ୍କୁ ଓଡ଼ିଶାର ଜୀବନ୍ଧ ସଂସ୍କୃତି ସମ୍ପର୍କିତ ଏକ ପୁସ୍ତକ ଉପହାର ସ୍ବରୂପ ପ୍ରଦାନ କରାଯାଇଥିଲା। ଏହି ଅବସରରେ ଶକ୍ତି ବିଭାଗର ଅତିରିକ୍ତ ମୁଖ୍ୟ ଶାସନ ସଚିବ ଶ୍ରୀ ବିଶାଳ କୁମାର ଦେବ ଏବଂ କୃଷି ଓ କୃଷକ ସଶକ୍ତିକରଣ ବିଭାଗର କମିଶନର-ତଥା-ଶାସନ ସଚିବ ଶ୍ରୀ ସଚିନ ରାମଚନ୍ଦ୍ର ଯାଦବ ଉପସ୍ଥିତ ଥୂଲେ।
