Rozgaar par Chot aur Badhti Berozgari: Kya Charminar ke Vendors ka Mustaqbil Andheray mein hai?
Rozgaar par Chot aur Badhti Berozgari: Kya Charminar ke Vendors ka Mustaqbil Andheray mein hai?
Tehreer: Syed Mukaram Uddin (Social Worker)
Hyderabad: Charminar, jo Hyderabad ki shaan aur pehchan hai, aaj wahan ke chote karobariyon aur street vendors ke liye ek imtehan ki jagah ban gaya hai. Pichle kuch dino se police aur municipal authorities ki sakht kaarvayi ne saikdon gharon ka chulha thanda kar diya hai. Lekin masla sirf chalan aur saaman zabti tak mahdood nahi hai, iske peeche ek gehra samaji (social) bohran chupa hua hai.
Berozgari aur Juraim (Crime) ka Rishta
Kanoon aur nizam-e-sheher ko barqarar rakhna zaroori hai, lekin jab kisi ka rozgaar chhin liya jata hai aur use koi mutabadil (alternative) nahi diya jata, toh wo shakhs berozgari ki daldal mein phans jata hai. Maherin-e-nafsiyat (psychologists) aur smajiyat ke mutabiq, jab koi shakhs apne parivar ka pet nahi pal pata, toh wo mayoosi mein galat raste ikhtiyar karta hai.
Jorain (Crime): Berozgari aksar chori, daka-zani aur loot-maar ki wajah banti hai.
Nasha aur Drugs: Khali dimaag aur maali pareshani insaan ko nashe ki taraf dhakelti hai, jo "Mission Nasha mukt Bharat jaise maqsad ke liye ek badi rukawat hai.
Ladai-Jhagada aur Tashaddud: Jab dimaag par dabao (stress) hota hai, toh choti-choti baaton par marna-maarna aur katla-giri jaise waqiyat numa-yan hone lagte hain.
Street Vendors Act 2014 ki Khilaf-warzi
Sarkar ne 2014 mein kanoon banaya tha taaki vendors ko tahaffuz mile. Magar Charminar par ho rahi karrawayi mein is kanoon ki dhajjiyaan udayi ja rahi hain. Baghair survey aur baghair kisi "Vending Zone" ke logon ko unki jagah se hatana unhe jurm ki dunya ki taraf dhakelne ke barabar hai.
Ek Appeal, Ek Mashwara
Hukumat-e-Telangana aur GHMC ko chahiye ki wo is masle ka insani hamdardi (humanitarian grounds) par hal nikalein.
Vending Zones: Foran dedicated jagah muqarrar ki jaye jahan vendors bina kisi dar ke karobar kar sakein.
License System: Har vendor ko register kiya jaye taaki wo kanoon ke dairay mein reh kar kaam karein.
Samaji Islah: Police ko chahiye ki wo sirf danda na chalaye, balki in garibon ke rozgaar ko bachane mein madad kare taaki sheher mein aman-o-aman qayam rahe.
Agar humne aaj in vendors ke rozgaar ki hifazat nahi ki, toh kal yahi berozgari sheher mein badhte hue juraim ki surat mein hamare samne ayegi. Ek sehat-mand aur nashay se pak samaj ke liye rozgaar ka hona lazmi hai.
