రాజకీయ చదరంగంలో ఓడిపోయిన మహిళా ప్రాతినిధ్యం.

AIMA న్యూస్ న్యూఢిల్లీ బ్యూరో.. దేశ రాజకీయ ముఖచిత్రాన్ని మార్చేస్తుందని భావించిన చారిత్రాత్మక మహిళా రిజర్వేషన్ బిల్లు (131వ రాజ్యాంగ సవరణ) లోక్‌సభలో చతికిలపడింది. సుదీర్ఘ చర్చలు, వాడివేడి వాదనల అనంతరం జరిగిన ఓటింగ్‌లో ఈ బిల్లు వీగిపోయింది. మెజారిటీ సభ్యులు మద్దతు తెలిపినప్పటికీ, రాజ్యాంగ సవరణకు అవసరమైన ప్రత్యేక మెజారిటీ లేకపోవడంతో సాంకేతికంగా బిల్లు తిరస్కరణకు గురైంది.మొత్తం 489 మంది సభ్యులు ఓటింగ్‌లో పాల్గొనగా, ఫలితాలు కింది విధంగా ఉన్నాయి
బిల్లుకు అనుకూలంగా: 278 ఓట్లు
బిల్లుకు వ్యతిరేకంగా: 211 ఓట్లు
అవసరమైన మెజారిటీ (2/3): 326 ఓట్లు
రాజ్యాంగంలోని ఆర్టికల్ 368 ప్రకారం, ఒక సవరణ బిల్లు నెగ్గాలంటే సభకు హాజరై ఓటు వేసిన వారిలో కనీసం 2/3 వంతు మంది మద్దతు తెలపాలి. ప్రస్తుత లెక్కల ప్రకారం బిల్లు గట్టెక్కాలంటే 326 ఓట్లు రావాల్సి ఉండగా, కేవలం 278 ఓట్లు మాత్రమే రావడంతో బిల్లు వీగిపోయినట్లు స్పీకర్ ప్రకటించారు.సాధారణ బిల్లు అయితే ఈపాటికి చట్టరూపం దాల్చేది. కానీ, రాజ్యాంగ సవరణ కావడంతో నిబంధనలు అడ్డుగోడగా నిలిచాయి.ప్రభుత్వానికి సాధారణ మెజారిటీ ఉన్నప్పటికీ, విపక్షాల నుంచి ఆశించిన మద్దతు లభించకపోవడం, సొంత కూటమిలోని కొందరు సభ్యులు గైర్హాజరు కావడం బిల్లు పతనానికి ప్రధాన కారణంగా కనిపిస్తోంది.
ఓటింగ్ ఫలితాలు వెలువడగానే సభలో ఒక్కసారిగా నిశ్శబ్దం ఆవరించింది. మహిళా లోకానికి ప్రాతినిధ్యం కల్పించాలనే దశాబ్దాల కల మరోసారి అసంపూర్తిగానే మిగిలిపోయింది. అధికార పక్షం ఈ ఓటమిని విపక్షాల బాధ్యతారాహిత్యంగా అభివర్ణించగా, బిల్లులోని లోపాల వల్లే మద్దతు ఇవ్వలేదని ప్రతిపక్షాలు వాదించాయి.కేవలం 48 ఓట్ల తేడాతో మహిళా సాధికారతకు వేయాల్సిన ఒక గొప్ప పునాది కూలిపోయింది. అనుకూలంగా ఓటు వేయని ఆ 211 మంది సభ్యులు మహిళా ప్రాతినిధ్యాన్ని వ్యతిరేకిస్తున్నారా? లేక దీని వెనుక ఉన్న కోటాలో కోటా (OBC రిజర్వేషన్లు వంటివి) రాజకీయాలే ఈ అడ్డుగోడలకు కారణమా? అనే ప్రశ్నలు ఇప్పుడు తలెత్తుతున్నాయి.