ପାଞ୍ଚପୋଖରୀଆ ଓ ଶିରପୁର ଛକରେ ମଦର ଆସର: ପ୍ରଶାସନ ନିରବ, ଅତିଷ୍ଠ ସ୍ଥାନୀୟ ବାସିନ୍ଦା

ଚମ୍ପୁଆ : - [୧୫/୦୪]
ରାଜ୍ୟରେ ନିଶା ମୁକ୍ତ ଅଭିଯାନ ଚାଲିଥିବା ବେଳେ ଚମ୍ପୁଆ ପାଞ୍ଚପୋଖରୀଆ ଏବଂ ଶିରପୁର ଛକ ଅଞ୍ଚଳରେ ଏହାର ଓଲଟା ଚିତ୍ର ଦେଖିବାକୁ ମିଳିଛି । ଏହି ଅଞ୍ଚଳରେ ବ୍ୟାପକ ଭାବେ ଦେଶୀ ମହୁଲୀ ମଦ ବିକ୍ରି ହେଉଥିବା ଅଭିଯୋଗ ହୋଇଛି । ଖୋଲାଖୋଲି ଭାବେ ଚାଲିଥିବା ଏହି ବେଆଇନ କାରବାର ଯୋଗୁଁ ସ୍ଥାନୀୟ ପରିବେଶ ନଷ୍ଟ ହେବା ସହ ସାଧାରଣ ଜନଜୀବନ ଅତିଷ୍ଠ ହୋଇପଡ଼ିଛି।
​ଅଭିଯୋଗ ସତ୍ତ୍ୱେ କାର୍ଯ୍ୟାନୁଷ୍ଠାନ ଶୂନ୍ୟ
​ସବୁଠାରୁ ଆଶ୍ଚର୍ଯ୍ୟର ବିଷୟ ହେଉଛି, ଏହି ସମସ୍ୟା ବାବଦରେ ସ୍ଥାନୀୟ ଲୋକେ ବାରମ୍ବାର ପ୍ରଶାସନର ଦ୍ୱାରସ୍ଥ ହୋଇଛନ୍ତି। ସୂଚନା ଅନୁଯାୟୀ ​ଅବକାରୀ ବିଭାଗ,​ସ୍ଥାନୀୟ ପୋଲିସ,ବିଜ୍ଞାପିତ ଅଞ୍ଚଳ ପରିଷଦ (NAC) ଅଧିକାରୀ ଓ ଉପଜିଲ୍ଲାପାଳ (Sub-Collector)​ଏହି ସମସ୍ତ ବିଭାଗକୁ ଲିଖିତ ଓ ମୌଖିକ ଭାବେ ଜଣାଯାଇଥିଲେ ମଧ୍ୟ ଏପର୍ଯ୍ୟନ୍ତ କୌଣସି ଦୃଢ଼ ପଦକ୍ଷେପ ନିଆଯାଇ ନାହିଁ । ପ୍ରଶାସନର ଏଭଳି ନିରବତା ଅଞ୍ଚଳବାସୀଙ୍କ ମନରେ ଅସନ୍ତୋଷ ସୃଷ୍ଟି କରିବା ସହ ଅବକାରୀ ବିଭାଗ ଓ ପୋଲିସର କାର୍ଯ୍ୟଦକ୍ଷତା ଉପରେ ପ୍ରଶ୍ନବାଚୀ ସୃଷ୍ଟି କରିଛି।
​ବଢୁଛି ଅପରାଧିକ କାର୍ଯ୍ୟକଳାପ
​ମଦ ବିକ୍ରି ଯୋଗୁଁ ସନ୍ଧ୍ୟା ହେଲେ ଛକ ଜାଗାମାନଙ୍କରେ ନିଶାଖୋରଙ୍କ ଆଡ୍ଡା ଜମୁଛି, ଯାହା ଫଳରେ ମହିଳା ଓ ସ୍କୁଲ ଛାତ୍ରଛାତ୍ରୀମାନେ ଯିବାଆସିବା କରିବାରେ ଭୟଭୀତ ହେଉଛନ୍ତି। ଏଥିସହ ଅଞ୍ଚଳରେ ଛୋଟବଡ଼ ଗଣ୍ଡଗୋଳ ଓ ଅପରାଧିକ ମାମଲା ମଧ୍ୟ ବୃଦ୍ଧି ପାଉଛି। ସ୍ଥାନୀୟ ବାସିନ୍ଦା କହିବା କଥା ​"ଆମେ ସବୁ ଅଫିସକୁ ଦୌଡ଼ି ଦୌଡ଼ି ହତାଶ ହୋଇଗଲୁଣି, ହେଲେ ମଦ ବିକ୍ରି ବନ୍ଦ ହେଉନାହିଁ । ଏହା କାହାର ଛତ୍ରଛାୟା ତଳେ ଚାଲିଛି?" ଜନସାଧାରଣଙ୍କ ଦାବି
​ଯଦି ତୁରନ୍ତ ଏହି ବେଆଇନ ମଦ କାରବାର ଉପରେ ରୋକ୍ ନଲଗାଯାଏ, ତେବେ ଆଗାମୀ ଦିନରେ ଅଞ୍ଚଳବାସୀ ରାଜପଥକୁ ଓହ୍ଲାଇବା ସହ ଆନ୍ଦୋଳନାତ୍ମକ ପନ୍ଥା ଗ୍ରହଣ କରିବେ ବୋଲି ଚେତାବନୀ ଦେଇଛନ୍ତି