ऐतिहासिक वारसा जतनाकडे प्रशासनाचे दुर्लक्ष; ग्रामस्थांचा आक्रमक पवित्रा
वारसा नामशेष होण्याच्या मार्गावर; संवर्धनासाठी तातडीची मागणी
सासवड : पुरंदर तालुक्याला ऐतिहासिक वारशाची मोठी परंपरा लाभली असली तरी अनेक ठिकाणी या वारशाकडे प्रशासनाचे दुर्लक्ष होत असल्याचे चित्र समोर येत आहे. माळरगड आणि किल्ले पुरंदरप्रमाणेच बेलसर परिसरातही स्वराज्यकालीन महत्त्वाच्या घटना घडल्या होत्या. मात्र त्या ऐतिहासिक आठवणी आणि स्मारकांची योग्य देखभाल व संवर्धन होत नसल्याने स्थानिकांमध्ये नाराजी वाढत आहे.
इतिहासाच्या नोंदींनुसार हिंदवी स्वराज्याच्या सुरुवातीच्या लढायांपैकी एक लढाई बेलसर येथे पार पडली होती. त्या लढ्याच्या स्मरणार्थ उभारण्यात आलेली काही स्मारके सध्या दुर्लक्षित अवस्थेत असून, त्यांच्या जतनासाठी कोणतीही ठोस उपाययोजना करण्यात आलेली दिसत नाही. त्यामुळे हा वारसा हळूहळू नामशेष होण्याच्या मार्गावर असल्याची खंत व्यक्त होत आहे.
या पार्श्वभूमीवर बेलसर ग्रामस्थांनी पुढाकार घेत स्मारकांचे जतन, संवर्धन आणि संरक्षण व्हावे यासाठी प्रशासनाकडे वारंवार पाठपुरावा केला आहे. पुरंदर तहसील कार्यालयाकडे निवेदन देऊन संबंधित स्मारकांचा राज्य संरक्षित वारसा म्हणून दर्जा देण्याची मागणी करण्यात आली आहे. तसेच यासंदर्भातील आवश्यक कागदपत्रे आणि ऐतिहासिक पुरावेही प्रशासनाला सादर करण्यात आले आहेत.
तथापि, अद्यापही प्रशासनाकडून अपेक्षित प्रतिसाद मिळत नसल्याची भावना ग्रामस्थांमध्ये आहे. संबंधित अधिकाऱ्यांनी प्रत्यक्ष पाहणी न केल्यामुळे कामात विलंब होत असल्याचा आरोप स्थानिकांकडून करण्यात येत आहे. त्यामुळे ग्रामस्थांनी आता अधिक आक्रमक भूमिका घेत तातडीने स्मारक संवर्धनासाठी ठोस पावले उचलण्याची मागणी केली आहे.
दरम्यान, जिल्हा परिषद व प्रशासनाने या प्रकरणाकडे गांभीर्याने लक्ष देऊन लवकरात लवकर कार्यवाही करावी, अन्यथा पुढील काळात तीव्र आंदोलनाचा इशारा ग्रामस्थांनी दिला आहे.
