കേരളം നാളെ പോളിങ് ബൂത്തിലേക്ക് ഇന്ന് നിശബ്ദ പ്രചാരണം; വോട്ടെടുപ്പ് രാവിലെ 7 മുതൽ വൈകിട്ട് 6 വരെ

തിരുവനന്തപുരം, ഏപ്രിൽ 8: നിയമസഭ തെരഞ്ഞെടുപ്പിനായി കേരളം നാളെ പോളിങ് ബൂത്തിലേക്ക്. തിരഞ്ഞെടുപ്പ് ചട്ടപ്രകാരം ഇന്ന് സംസ്ഥാനത്ത് നിശബ്ദ പ്രചാരണം തുടരുന്നു. നാളെ രാവിലെ ഏഴ് മുതൽ വൈകിട്ട് ആറുവരെയാണ് വോട്ടെടുപ്പ് നടക്കുക.
വോട്ടിങ് യന്ത്രം ഉൾപ്പെടെയുള്ള തെരഞ്ഞെടുപ്പ് സാമഗ്രികളുടെ വിതരണം ഇന്ന് രാവിലെ എട്ട് മുതൽ നിയോജകമണ്ഡലതല കേന്ദ്രങ്ങളിൽ ആരംഭിക്കും. നിശബ്ദ പ്രചാരണ സമയത്തെ ഉത്തരവ് ലംഘിക്കുന്നവര്‍ക്കെതിരെ കര്‍ശന നടപടി സ്വീകരിക്കുമെന്ന് അധികൃതർ അറിയിച്ചു.
വോട്ടർമാർക്ക് ബൂത്തിനുള്ളിലേക്ക് മൊബൈൽ ഫോണുകൾ കൊണ്ടുപോകാൻ അനുവദിക്കില്ല 📵. മൊബൈൽ ഫോൺ സുരക്ഷിതമായി സൂക്ഷിക്കാൻ ബൂത്തുകളിൽ ഡെപ്പോസിറ്റ് സൗകര്യവും ഒരുക്കിയിട്ടുണ്ട്.
സംസ്ഥാനത്താകെ 2,71,42,952 വോട്ടർമാരാണുള്ളത്. സർവീസ് വോട്ടർമാരുടെ എണ്ണം 53,984 ആണ്. വിവിധ മണ്ഡലങ്ങളിൽ നിന്ന് 883 സ്ഥാനാർത്ഥികളാണ് ജനവിധി തേടുന്നത്.
24 താൽക്കാലിക ബൂത്തുകൾ ഉൾപ്പെടെ 30,495 പോളിങ് ബൂത്തുകൾ സജ്ജമാക്കിയിട്ടുണ്ട് 🏫. പ്രശ്‌നബാധിതമായി തിരിച്ചറിഞ്ഞ 2,040 ബൂത്തുകളിൽ പ്രത്യേക സുരക്ഷാ ക്രമീകരണങ്ങൾ ഏർപ്പെടുത്തി.
വീടുകളിൽ നടത്തിയ വോട്ടെടുപ്പ് 98 ശതമാനം പൂർത്തിയായതായി തെരഞ്ഞെടുപ്പ് കമ്മീഷൻ അറിയിച്ചു. തെരഞ്ഞെടുപ്പിനായി മതിയായ സുരക്ഷാ ക്രമീകരണങ്ങൾ ഒരുക്കിയതായും ആവശ്യമായ പൊലീസ് ഉദ്യോഗസ്ഥരെ വിന്യസിച്ചതായും അധികൃതർ വ്യക്തമാക്കി.