निवृत्त अधिकाऱ्याच्या घरात चोरट्यांची हातसफाई

जळगाव : दाम्पत्य मुलाकडे गेलेले असताना चोरट्यांनी त्यांच्या घरातून गॅस सिलिंडर व पाण्याची मोटर असा एकूण सहा हजार ५०० रुपये किंमतीचा मुद्देमाल चोरून नेला. ही घटना १ एप्रिल रोजी उघडकीस आली. या प्रकरणी २ रोजी शहर पोलिस ठाण्यात अज्ञात चोरट्यांविरुद्ध गुन्हा दाखल करण्यात आला आहे. नायब तहसीलदार म्हणून निवृत्त झालेले मनोहर सुकलाल ठाकरे (७४, रा. भिकमचंद जैननगर) हे पत्नीसह ४ मार्च रोजी ठाणे येथे मुलाकडे गेले होते. त्या वेळी चोरट्यांनी त्यांच्या घरातून गॅस सिलिंडर व पाण्याची मोटर चोरून नेली. १ एप्रिल रोजी हा प्रकार शेजारच्यांच्या लक्षात आला. त्यांनी माहिती दिल्यानंतर ठाकरे हे घरी परतले. याविषयी शहर पोलिस ठाण्यात देण्यात आलेल्या फिर्यादीवरून अज्ञात चोरट्यांविरुद्ध गुन्हा दाखल करण्यात आला आहे.