भोंदू बाबा अशोक खरात नंतर परत वसई तील भोंदू बाबा ने आपण महादेव असून तू पार्वती आहेस असे बोलून पुण्यातील 35 वर्षीय महिले वर अत्याचार.गुन्हा दाखल

'मी शंकर, तू पार्वती' म्हणत पुण्यात ३५ वर्षीय महिलेवर भोंदूबाबाचा अत्याचार; वसईच्या स्वयंघोषित धर्मगुरूवर गुन्हा दाखल
राज्यात सध्या अशोक खरात प्रकरणाची एसआयटीमार्फत सखोल चौकशी सुरू असतानाच, आता आणखी एका भोंदूबाबाचा धक्कादायक प्रकार उघडकीस आला आहे. 'मी स्वतः शंकर असून तू माझी पार्वती आहेस,' अशी थाप मारून पुणे येथील एका ३५ वर्षीय महिलेवर लैंगिक अत्याचार केल्याप्रकरणी वसई मधील स्वयंघोषित धर्मगुरू ऋषिकेश वैद्य याच्यावर वसई येथील माणिकपूर पोलीस ठाण्यात गुन्हा दाखल करण्यात आला आहे. गुन्ह्याचे गांभीर्य आणि घटनास्थळ पाहता पुढील तपासासाठी हे प्रकरण पुण्यातील मांजरी पोलीस ठाण्याकडे वर्ग करण्यात आले आहे.
पोलिसांनी दिलेल्या माहितीनुसार, पीडित महिला पुणे येथे वास्तव्यास असून २०२३ मध्ये तिची ओळख फेसबुकवरून ऋषिकेश वैद्य याच्याशी झाली होती. हा आरोपी आमची वसई या संस्थेचा प्रमुख आणि स्वतःला धर्मगुरू म्हणवून घेणारा आहे. त्याने महिलेच्या धार्मिक प्रवृत्तीचा गैरफायदा घेत अध्यात्माचे धडे देण्याच्या बहाण्याने तिच्याशी जवळीक वाढवली. डिसेंबर २०२३ मध्ये तो या महिलेला भेटण्यासाठी थेट पुण्यात गेला. तिथे 'मी साक्षात महादेवायचा अवतार आहे आणि तू माझी पार्वती आहेस,' असे सांगून त्याने तिला भुरळ घातली. त्यानंतर त्याने महिलेला पुण्यातील मांजरी परिसरातील एका लॉजवर नेले. तेथे तिला गुंगीचे औषध देऊन तिच्यावर अत्याचार केला. धक्कादायक बाब म्हणजे, याच वेळी त्याने तिच्या नकळत तिचे काही आक्षेपार्ह फोटोही काढले.
या फोटोंचा आधार घेत आरोपीने महिलेला ब्लॅकमेल करण्यास सुरुवात केली आणि तिला वारंवार भेटण्यासाठी दबाव टाकला. त्यानंतर मे २०२५ मध्ये त्याने पीडितेला वसईतील हॉटेल एक्सप्रेस इन येथे बोलावून पुन्हा तिच्यावर अतिप्रसंग करण्याचा प्रयत्न केला. दरम्यानच्या काळात, नाशिकच्या अशोक खरात या भोंदूबाबाचे बिंग फुटल्यानंतर पीडित महिलेला धीर आला. तिने धाडस एकवटून घडलेला सर्व प्रकार आपल्या पतीला सांगितला. त्यानंतर बुधवारी संध्याकाळी या दाम्पत्याने वसईच्या माणिकपूर पोलीस ठाण्यात धाव घेत ऋषिकेश वैद्य याच्या विरोधात रीतसर तक्रार दाखल केली.
या प्रकरणातील अत्याचाराची पहिली घटना पुण्यात घडल्यामुळे हा गुन्हा पुण्यातील मांजरी पोलीस ठाण्यात हस्तांतरित करण्यात आला आहे, अशी माहिती माणिकपूर पोलीस ठाण्याचे वरिष्ठ पोलीस निरीक्षक हिरालाल जाधव यांनी दिली. आरोपी ऋषिकेश वैद्य याने स्वतःला धर्मगुरू भासवून अशाच प्रकारे अनेक निष्पाप मुलींना आपल्या जाळ्यात ओढले असून त्यांचेही लैंगिक शोषण केले असावे, असा गंभीर आरोप पीडित महिलेने केला आहे. पोलीस आता या प्रकरणाचा अधिक सखोल तपास करत आहेत.

पत्रकाराचे मत: समाजात अध्यात्माच्या नावाखाली महिलांची फसवणूक करणारे असे भोंदूबाबा अजूनही सक्रिय आहेत, ही अत्यंत चिंतेची बाब आहे. अंधश्रद्धा आणि भाबड्या भक्तीचा गैरफायदा घेणाऱ्या अशा प्रवृत्तींवर कायद्याचा कठोर बडगा उगारणे काळाची गरज बनली आहे. नागरिकांनीही अशा भोंदूगिरीला बळी न पडता वेळीच सावधगिरी बाळगायला हवी.

⚠️महत्त्वाची नोंद - कोणतीही खोटी बातमी न पसरवण्यास आम्ही कटिबद्ध आहोत. तरीही, अनावधानाने एखाद्या पोस्टमध्ये चुकीची माहिती आल्यास, कृपया आम्हाला ती लिंक आणि सविस्तर माहिती इनबॉक्स करा. आम्ही तथ्यांची तपासणी करून ती बातमी त्वरित हटवू. कोणतीही चूक आढळल्यास नक्की मेसेज मध्ये संपर्क साधा ! - YFC MEDIA

टीप: बातमीतील व्यक्तीचा फोटो मूळ (Original) आहे. फोटोच्या चांगल्या सादरीकरणासाठी (Presentation) आणि ग्राफिक्ससाठी AI तंत्रज्ञानाचा वापर केला आहे.