🚨 બ્રેકિંગ ન્યૂઝ | બોડેલી 🚨 ટ્રેક્ટર ટ્રોલી ચોરીના ૨ ગુનાઓ ઉકેલાયા, આરોપી ઝડપાયો

બોડેલી પોલીસે ટ્રેક્ટર ટ્રોલી ચોરીના ૨ ગુનાઓ ઉકેલ્યા, આરોપી ઝડપાયો

છોટાઉદેપુર જિલ્લામાં બોડેલી પોલીસ સ્ટેશન વિસ્તારમાં અલગ-અલગ સ્થળોએ થયેલી ટ્રેક્ટરની ટ્રોલીઓની ચોરીના બનાવોમાં પોલીસને મોટી સફળતા મળી છે. પોલીસે મુદ્દામાલ સાથે આરોપીને પકડી પાડી કુલ બે વણશોધાયેલા ચોરીના ગુનાઓનો ભેદ ઉકેલી કાઢ્યો છે.

જિલ્લા પોલીસ અધિક્ષક ઈમ્તિયાઝ શેખ તેમજ મદદનીશ પોલીસ અધિક્ષક હર્ષ શર્મા દ્વારા જિલ્લામાં મિલકત સંબંધિત ગુનાઓને અટકાવવા તથા વણશોધાયેલા ગુનાઓ ઉકેલવા માટે તમામ પોલીસ સ્ટેશનને જરૂરી સૂચનાઓ આપવામાં આવી હતી.

આ માર્ગદર્શન હેઠળ બોડેલી પોલીસ સ્ટેશનના પોલીસ ઇન્સ્પેક્ટર વિ.એસ. ગાવિતે સ્ટાફને સક્રિય પેટ્રોલિંગ માટે સૂચના આપી હતી. પેટ્રોલિંગ દરમિયાન ખાનગી બાતમીના આધારે માહિતી મળી કે માંકણી અને તાંદલજા ગામેથી ટ્રેક્ટરની ટ્રોલીઓ ચોરી કરનાર વ્યક્તિએ તેને વેચી દીધી છે.

પોલીસે તપાસ હાથ ધરી નાની રાસ્કી ગામના ગણપતભાઈ અમરસિંહભાઈ બારીયાને ઝડપી પાડ્યો હતો. શરૂઆતમાં પૂછપરછ દરમિયાન આરોપીએ ગુનો કબૂલ કર્યો હતો. તેણે ત્રણ મહિના પહેલાં માંકણી અને તાંદલજા ગામેથી રાત્રિના સમયે ટ્રોલીઓ ચોરી કરી જેતપુર પાવી ખાતે વેચાણ કર્યું હોવાનું ખુલ્યું હતું.

પોલીસે વધુ તપાસ કરતા ટ્રેક્ટરની બે ટ્રોલીઓ મળી આવી હતી, જેની કુલ કિંમત રૂપિયા 1,10,000 ગણાય છે. પોલીસે મુદ્દામાલ કબજે લઇ આરોપી વિરુદ્ધ કાયદેસર કાર્યવાહી હાથ ધરી છે.

પકડાયેલ આરોપી:
ગણપતભાઈ અમરસિંહભાઈ બારીયા, રહે. નાનીરાસ્કી, તા. બોડેલી, જી. છોટાઉદેપુર

ડિટેક્ટ થયેલ ગુનાઓ:

1. બોડેલી પોલીસ સ્ટેશન એ.પાર્ટ ગુ.ર. નં. 11184001260549/2026 – કલમ 305(બી), BNS-2023

2. બોડેલી પોલીસ સ્ટેશન એ.પાર્ટ ગુ.ર. નં. 11184001260550/2026 – કલમ 305(બી), BNS-2023

બોડેલી પોલીસની આ કામગીરીથી વિસ્તારમાં ચોરીના ગુનાઓ પર નિયંત્રણ લાવવા દિશામાં મહત્વપૂર્ણ પગલું ગણાય રહ્યું છે.