ମୁକୁନା ଶ୍ରୀରାମ ମନ୍ଦିରରେ ଅଶୋକାଷ୍ଟମୀ ଉପଲକ୍ଷେ ହରିହର ଭେଟ ସମାରୋହ ଆଜି।

*ମୁକୁନା ଶ୍ରୀରାମ ମନ୍ଦିରରେ ଅଶୋକାଷ୍ଟମୀ ଉପଲକ୍ଷେ ହରିହର ଭେଟ ସମାରୋହ ଆଜି*





ମୁକୁନା, (୨୬/୦୩): ପବିତ୍ର ଅଶୋକାଷ୍ଟମୀ ଅବସରରେ ମୁକୁନା ଶ୍ରୀରାମ ମନ୍ଦିରରେ ଆଜି ବିଭିନ୍ନ ଧାର୍ମିକ ଆଚାର-ଅନୁଷ୍ଠାନ ସହ ଭକ୍ତିମୟ ପରିବେଶରେ ହରିହର ଭେଟ ସମାରୋହ ଆୟୋଜିତ ହେବାକୁ ଯାଉଛି। ଏହି ପବିତ୍ର ଦିନରେ ପ୍ରଭୁ ଶ୍ରୀରାମଙ୍କ ଚଳନ୍ତି ପ୍ରତିମା ମନ୍ଦିରରୁ ବାହାରି ନଗର ପରିକ୍ରମା କରିବେ, ଯାହା ଦେଖିବା ପାଇଁ ଭକ୍ତମାନଙ୍କ ମଧ୍ୟରେ ବିଶେଷ ଉତ୍ସାହ ଦେଖାଯାଉଛି।

ପାରମ୍ପରିକ ରୀତି-ନୀତି ଅନୁଯାୟୀ, ପ୍ରଭୁଙ୍କ ଚଳନ୍ତି ପ୍ରତିମା ନଗର ପରିକ୍ରମା ପରେ ପ୍ରାଚୀନ ଆରାଧନା ସ୍ଥଳୀ ମା କୈକେୟୀ କୁଟୀରରେ ବିଜେ କରିବେ। ସେଠାରେ ପ୍ରଭୁଙ୍କୁ ପାରମ୍ପରିକ ଭୋଗ ‘ଯୋଡ଼ ପିଠା’ ଅର୍ପଣ କରାଯିବ। ଏହି ଅନୁଷ୍ଠାନ ଦୀର୍ଘଦିନ ଧରି ଚାଲିଆସୁଥିବା ଏକ ପ୍ରାଚୀନ ପରମ୍ପରା, ଯାହା ଗ୍ରାମବାସୀଙ୍କ ଧାର୍ମିକ ଆସ୍ଥା ସହ ଗଭୀର ଭାବେ ଜଡିତ।

ତାପରେ ପ୍ରଭୁ ଭକ୍ତମାନଙ୍କ ଗହଣରେ ପୁନର୍ବାର ମନ୍ଦିରକୁ ଫେରି ମହାସ୍ନାନ କରିବେ। ପରବର୍ତ୍ତୀ ଅନୁଷ୍ଠାନ ଭାବେ ଯଜ୍ଞ ବେଦୀରେ ହରିହର ଭେଟ ସମାରୋହ ଆୟୋଜିତ ହେବ, ଯେଉଁଠାରେ ଭଗବାନ ଶିବ ଓ ପ୍ରଭୁ ଶ୍ରୀରାମଙ୍କ ଦିବ୍ୟ ସମ୍ମିଳନ ଦୃଶ୍ୟ ଭକ୍ତମାନଙ୍କୁ ଆଧ୍ୟାତ୍ମିକ ଆନନ୍ଦରେ ଭରିଦେବ।

ଏହି ଅବସରରେ ମନ୍ଦିର ପ୍ରାଙ୍ଗଣ ଓ ସମ୍ପୂର୍ଣ୍ଣ ଅଞ୍ଚଳକୁ ସୁନ୍ଦର ଭାବେ ସଜାଯାଇଛି ଓ ଭକ୍ତମାନଙ୍କ ସୁବିଧା ପାଇଁ ପ୍ରଚୁର ବ୍ୟବସ୍ଥା କରାଯାଇଛି। ହଜାରହଜାର ଭକ୍ତଙ୍କ ସମାଗମ ହେବାର ସମ୍ଭାବନା ରହିଥିବାରୁ ପ୍ରଶାସନ ମଧ୍ୟ ସଚେତନ ରହିଛି।

ସମୁଦାୟ ମୁକୁନା ଅଞ୍ଚଳ ଏବେ ଭକ୍ତି ଓ ଉତ୍ସବମୁଖର ପରିବେଶରେ ମଗ୍ନ ହୋଇପଡ଼ିଛି।



କମଳଲୋଚନ ମହାନ୍ତ ଙ୍କ ରିପୋର୍ଟ।