"Iron Dome" ya Phata Condom
Takabbur ke Butt: "Iron Dome" ya Phata Condom
Ek zamana tha jab maghribi (Western) media ne humein yeh bawar kara rakha tha ke Israel woh aahni deewar hai jisay chuna toh door, us ki taraf dekhna bhi khudkushi hai. Magar phir waqt ne karwat li aur Iran ne un ke is waham ka woh janaza nikala ke dekhne wale ungliyan danton talay daba baithe. Woh riyasat jo khud ko na-qabil-e-taskheer (invincible) kehti thi, jab us ne Iran ko chedne ki bhayanak himaqat ki, toh jawab mein usay woh "khrashein" lagein ke un ka poora difai dhancha (defense structure) tash ke patton ki tarah bikhar gaya.
Humein daraya gaya tha ke Amriki bahri beray (Abraham Lincoln) samundaron ke woh deo-haikal khuda hain jin ke saye se lehrein kanpti hain. Lekin jab Trump ne sheikhi baghartay hue Iran par hamlay ki bewaqufi ki, toh woh "azeem-ush-shan" jahaz khaleej-e-fars (Persian Gulf) se yun gayab hue jaise gadhe ke sar se seeng! Woh beray, jo raub aur dabdabay ki alamat thay, achanak aisi gumnami ke ghaar mein ja giray ke dhoondne se bhi suragh nahi mil rahe hain.
Mashriq-e-Wusta (Middle East) mein banay woh jadeed tareen aur "mahfooz" Amriki fauji adday, jin ki mazbooti ke qissay fakhriya sunaye jatay thay, jab imtihan ka waqt aaya toh maloom hua ke woh faulaad se nahi balkay "makri ke jaalon" se banay thay.
Aur woh "Iron Dome"? Jis ka dhol poori duniya mein peeta gaya tha ke yeh parinda bhi par nahi maarne dega, Irani missileon ke saamne woh kisi "phati hui chhatri" se zyada sabit na hua. Woh technology jis par naaz tha, Irani barood ke saamne khilone ki tarah bikhar gayi.
"Pabandiyon ka shikar Iran, jisay duniya ki tanhai ka tana diya gaya, aaj usi ne super power ke chehre par woh zanatay-dar thappar jara hai ke Washington ke aiwanon mein bokhlahat ka raqs saaf dekha ja sakta hai."
Duniya humein batati rahi ke America aasman ka bila-shirkat-e-ghairay badshah hai, magar jab un ke mehangay tareen fighter jets ke parkhachay fazaon mein uraye gaye, toh aasmani badshahat ka tilism bhi toot gaya. Duniya ko isharon par nachane wale ko aabnaye hurmuz (Strait of Hormuz) ko khulwanay ke liye jab "super power" ke sardar manton aur dhamkiyon par utar aaye, toh samajh aa gaya ke taqat ka tarazu ab badal chuka hai.
Hasil-e-Kalam yeh hai ke:
Duniya ke yeh naam-nihad khuda, un ke zang-alood hathiyar aur un ke waqti ittihad mahz ek saraab hain. Tareekh gawah hai ke jab baatil ka gharoor had se barhta hai, toh usay mitane ke liye koi "mazloom" hi uthta hai. Beshak, taqtein aani jaani hain, saltanatein mitne ke liye hain, lekin daimi aur haqiqi iqtedar sirf Allah Rabb-ul-Izzat ka hai, jis ke saamne har Firaun ki bisaat ulat di jati hai.
