अवकाळी पावसामुळे साक्री तालुक्यात शेतकऱ्यांचे मोठे नुकसान

साक्री : धुळे जिल्ह्यातील साक्री तालुक्यात काल अचानक आलेल्या अवकाळी पावसासह झालेल्या गारपिटीमुळे शेतकऱ्यांचे मोठ्या प्रमाणात नुकसान झाले आहे.

अचानक आलेल्या वादळी पावसामुळे शेतातील उभ्या पिकांवर परिणाम झाला असून विशेषतः कांदा, गहू व द्राक्ष या पिकांचे मोठे नुकसान झाले आहे. गारांच्या तडाख्यामुळे द्राक्षबागा उद्ध्वस्त झाल्या असून अनेक ठिकाणी कांद्याचे पीक जमिनीवर कोसळले आहे. तसेच गव्हाचे पिकही आडवे पडल्याने उत्पादनात मोठी घट होण्याची शक्यता व्यक्त केली जात आहे.

शेतकऱ्यांनी मोठ्या कष्टाने उभे केलेले पीक काही मिनिटांतच नष्ट झाल्याने परिसरात हळहळ व्यक्त केली जात आहे. अनेक शेतकरी आर्थिक संकटात सापडले असून शासनाकडून तात्काळ पंचनामे करून नुकसानभरपाई देण्याची मागणी होत आहे.

दरम्यान, प्रशासनाने संबंधित विभागांना तातडीने पाहणी करून अहवाल सादर करण्याच्या सूचना दिल्या आहेत.

👉 या अवकाळी संकटामुळे शेतकरी वर्ग चिंतेत असून शासनाच्या मदतीकडे सर्वांचे लक्ष लागले आहे.
यशवंत शिंदे