మధ్యాహ్న భోజన నాణ్యతపై రాజీ పడొద్దు – అధికారులకు ఎమ్మెల్యే ఆదేశాలు

కోవూరు పట్టణంలోని బాలికల ఉన్నత పాఠశాలను కోవూరు ఎమ్మెల్యే Vemireddy Prasanthi Reddy శనివారం ఆకస్మికంగా తనిఖీ చేశారు. పాఠశాలలో ఉన్న వసతులు మరియు మధ్యాహ్న భోజన పథకం అమలు తీరును ఆమె స్వయంగా పరిశీలించారు.
ఈ సందర్భంగా విద్యార్థినులు ఆరుబయట కూర్చుని భోజనం చేయడం గమనించిన ఎమ్మెల్యే ప్రశాంతి రెడ్డి, పాఠశాల ఆవరణలో త్వరలోనే అత్యాధునిక డైనింగ్ హాల్ నిర్మించాలని అధికారులను ఆదేశించారు. విద్యార్థినులు గౌరవప్రదంగా కూర్చుని భోజనం చేసేలా చర్యలు తీసుకుంటామని హామీ ఇచ్చారు.
భోజన నాణ్యతను పరిశీలించేందుకు ఎమ్మెల్యే స్వయంగా విద్యార్థినుల మధ్య కూర్చుని వారితో కలిసి మధ్యాహ్న భోజనం చేశారు. వంటకాల రుచి, పరిశుభ్రతపై సంతృప్తి వ్యక్తం చేసిన ఆమె, నాణ్యత విషయంలో ఎక్కడా రాజీ పడకూడదని నిర్వాహకులకు సూచించారు.
ప్రభుత్వ పాఠశాలలో కనీస వసతుల కల్పనకు తాను కృషి చేస్తానని ఈ సందర్భంగా ఎమ్మెల్యే తెలిపారు.