जामखेडमध्ये अज्ञातांचा हल्ला; सागर मोहळकरवर गोळ्या झाडल्या...

जामखेड (अहिल्यानगर) – शहरात खळबळ उडविणाऱ्या घटनेत जामखेड येथील कुख्यात गुंड सागर मोहळकर याच्यावर अज्ञात हल्लेखोरांनी तीन ते चार गोळ्या झाडल्या. या गोळीबारात मोहळकर गंभीर जखमी झाला असून त्याच्यावर तातडीने रुग्णालयात उपचार सुरू आहेत.

प्राथमिक माहितीनुसार, ही घटना शहरातील गर्दीच्या भागात घडली. अचानक झालेल्या गोळीबारामुळे परिसरात भीतीचे वातावरण निर्माण झाले. प्रत्यक्षदर्शींनी सांगितले की, मोटारसायकलवरून आलेल्या अज्ञातांनी जवळून गोळ्या झाडून घटनास्थळावरून पळ काढला.

सागर मोहळकर याच्यावर यापूर्वी खुनाचा प्रयत्न (कलम ३०७) यासह विविध गंभीर गुन्हे दाखल असल्याची माहिती पोलिसांकडून मिळाली आहे. काही दिवसांपूर्वीच तो कारागृहातून जामिनावर बाहेर आला होता, अशीही चर्चा आहे.

घटनेनंतर पोलिसांनी तातडीने परिसर सील करून सीसीटीव्ही फुटेजची तपासणी सुरू केली आहे. आरोपींचा शोध घेण्यासाठी विशेष पथके रवाना करण्यात आली असून, शहरात नाकाबंदी करण्यात आली आहे.

या धाडसी गोळीबारामुळे कायदा व सुव्यवस्थेचा प्रश्न पुन्हा ऐरणीवर आला आहे. पुढील तपास पोलीस करत आहेत.

(अधिक तपशील प्रतीक्षेत...)
#जामखेड #गोळीबार #सागरमोहळकर #अहिल्यानगर #क्राईमन्यूज