खडकवाडी(लोणी)–सविंदणे मार्गावर मोराचा दुर्दैवी अंत

लोणी प्रतिनिधी – तेजस वाळुंज

ता. आंबेगाव तालुक्यातील लोणी गाव हद्दीत खडकवाडी–सविंदणे रस्त्यालगत चिमटा वस्ती जवळील ओढ्याच्या काठावर तीन दिवसांपूर्वी राष्ट्रीय पक्षी मोर मृतावस्थेत आढळून आल्याची घटना समोर आली आहे. या घटनेमुळे ग्रामस्थांमध्ये हळहळ व्यक्त होत असून वन्यजीवांच्या संरक्षणाचा मुद्दा पुन्हा एकदा चर्चेत आला आहे. मिळालेल्या माहितीनुसार, स्वप्निल रामदास सिनलकर हे नेहमीप्रमाणे आपल्या शेताकडे जात असताना शेताच्या कडेला असलेल्या ओढ्यात त्यांना मोर पडलेल्या अवस्थेत दिसला. संशय आल्याने त्यांनी जवळ जाऊन पाहिले असता तो मृत असल्याचे लक्षात आले. त्यांनी तत्काळ वनविभागाशी संपर्क साधत वनरक्षक योगेश निघोट यांना याबाबत माहिती दिली.
घटनेची माहिती मिळताच वनविभागाचे अधिकारी व कर्मचारी त्वरित घटनास्थळी दाखल झाले. त्यांनी पंचनामा करून मृत मोर ताब्यात घेतला. पुढील तपासणीसाठी मृतदेह निरगुडसर येथील पशुवैद्यकीय दवाखान्यात पाठविण्यात आला. पशुवैद्यकीय अधिकारी डॉ. अमोल तळेकर यांनी शवविच्छेदन केले असता मोराच्या पोटात प्लास्टिकचे तुकडे तसेच लोखंडी तारेचे अवशेष आढळून आले. या घातक वस्तूंचे सेवन झाल्यानेच मोराचा मृत्यू झाल्याचा प्राथमिक अंदाज व्यक्त करण्यात येत आहे. वनविभागाच्या वतीने संबंधित घटनेची नोंद घेण्यात आली असून पुढील कार्यवाही सुरू असल्याचे सांगण्यात आले. दरम्यान, मृत मोराचे अवसरी वनउद्यानात शासकीय नियमांनुसार दहन करण्यात आल्याची माहिती वनरक्षक योगेश निघोट यांनी दिली. सध्या लोणी व धामणी परिसरातील ओढे-नाले कोरडे पडू लागले आहेत. उन्हाळ्याची चाहूल लागल्याने पाण्याअभावी वन्य प्राणी व पक्षी अन्न-पाण्याच्या शोधात मानवी वस्तीकडे वळत आहेत. अशा परिस्थितीत कचरा, प्लास्टिक किंवा इतर घातक वस्तूंच्या संपर्कात येऊन वन्यजीवांचे जीवित धोक्यात येत असल्याचे चित्र आहे. या पार्श्वभूमीवर ग्रामस्थांनी वनविभागाने लोणी-धामणी परिसरात तातडीने पाणवठ्यांची व्यवस्था करावी, तसेच धान्य व सुरक्षित खाद्य उपलब्ध करून द्यावे, अशी मागणी केली आहे. यासोबतच नागरिकांनीही परिसरात प्लास्टिक व घातक कचरा टाकणे टाळावे, असे आवाहन करण्यात येत आहे.
या दुर्दैवी घटनेमुळे वन्यजीव संवर्धनासाठी प्रशासन आणि नागरिकांनी संयुक्तपणे पुढाकार घेण्याची गरज अधोरेखित झाली आहे.