ଡାହାଣୀ କୁପ୍ରଥା ଓ ମହିଳା ନିର୍ଯାତନା ବିରୋଧରେ ଜିଲ୍ଲା ସ୍ତରୀୟ ସଚେତନତା କର୍ମଶାଳା।
ଡାହାଣୀ କୁପ୍ରଥା ଓ ମହିଳା ନିର୍ଯାତନା ବିରୋଧରେ ଜିଲ୍ଲା ସ୍ତରୀୟ ସଚେତନତା କର୍ମଶାଳା।
କେନ୍ଦୁଝର,ତା୨୦/୨- ସମାଜରୁ କୁସଂସ୍କାର ଓ ଅନ୍ଧବିଶ୍ୱାସ ଦୂର କରିବା ସହ ଡାହାଣୀ ସନ୍ଦେହରେ ହେଉଥିବା ଅମାନୁଷିକ ନିର୍ଯାତନାକୁ ରୋକିବା ପାଇଁ ଆଜି କେନ୍ଦୁଝର ଜିଲ୍ଲାପାଳଙ୍କ କାର୍ଯ୍ୟାଳୟ ସ୍ଥିତ ଦରବାର ହଲ୍ଠାରେ ଜିଲ୍ଲା ସ୍ତରୀୟ ସଚେତନତା କର୍ମଶାଳା ଅନୁଷ୍ଠିତ ହୋଇଯାଇଛି। ଓଡ଼ିଶା ସରକାରଙ୍କ ମହିଳା ଓ ଶିଶୁ ବିକାଶ ବିଭାଗର ନିର୍ଦ୍ଦେଶ କ୍ରମେ କେନ୍ଦୁଝର ଜିଲ୍ଲା ସମାଜ ମଙ୍ଗଳ ବିଭାଗ ପକ୍ଷରୁ ଏହି କାର୍ଯ୍ୟକ୍ରମ ଆୟୋଜିତ ହୋଇଥିଲା। ଏହି କର୍ମଶାଳାରେ ଜିଲ୍ଲା ଆଇନ ସେବା ପ୍ରାଧିକରଣର ସଚିବ ସସ୍ମିତା ନନ୍ଦିନୀ ତ୍ରିପାଠୀ ଯୋଗଦେଇ ମହିଳାମାନଙ୍କ ସୁରକ୍ଷା ଓ ଆଇନଗତ ଅଧିକାର ଉପରେ ଗୁରୁତ୍ୱାରୋପ କରିଥିଲେ। ସେ କହିଥିଲେ ଯେ, ଡାହାଣୀ ସନ୍ଦେହ କରି ଜଣେ ମହିଳାଙ୍କୁ ଶାରୀରିକ ଓ ମାନସିକ ନିର୍ଯାତନା ଦେବା ଏକ ଗୁରୁତର ଅପରାଧ। ଅନେକ ସମୟରେ କେବଳ ସନ୍ଦେହ ଆଧାରରେ ନିରୀହ ମହିଳାମାନଙ୍କୁ ସମାଜରୁ ବାସନ୍ଦ କରାଯାଇଥାଏ, ଯାହା ଅତ୍ୟନ୍ତ ଦୁର୍ଭାଗ୍ୟଜନକ। ସଚେତନତା ଓ ଶିକ୍ଷା ହିଁ ସମାଧାନ ଶ୍ରୀମତୀ ତ୍ରିପାଠୀ ତାଙ୍କ ଅଭିଭାଷଣରେ କହିଥିଲେ ଯେ, ଏହି କୁପ୍ରଥାକୁ କେବଳ ପୋଲିସ ବା ଆଇନ ଦ୍ୱାରା ସମ୍ପୂର୍ଣ୍ଣ ରୂପେ ଦୂର କରାଯାଇପାରିବ ନାହିଁ। ଏଥିପାଇଁ ସମ୍ବେଦନଶୀଳତା ଗ୍ରାମାଞ୍ଚଳରେ ଲୋକଙ୍କୁ ଏହି ଅନ୍ଧବିଶ୍ୱାସ ବିଷୟରେ ସଚେତନ କରାଇବା ଆବଶ୍ୟକ। ଶିକ୍ଷାର ପ୍ରସାର ଦ୍ୱାରା ହିଁ ଲୋକଙ୍କ ମନରୁ ଅନ୍ଧବିଶ୍ୱାସ ଦୂର ହୋଇପାରିବ। ସେହିପରି ଅତିରିକ୍ତ ଆରକ୍ଷୀ ଅଧୀକ୍ଷକ ପ୍ରଭା ସ୍ୱାଇଁ କହିଥିଲେ ଏହି ସମସ୍ୟା କେବଳ ଗାଁରେ ସୀମିତ ନାହିଁ, ବରଂ ସହରାଞ୍ଚଳ ରେ ମଧ୍ୟ ଦେଖିବାକୁ ମିଳୁଛି। ଲୋକଙ୍କ ମାନସିକ ଅବସ୍ଥାକୁ ଲକ୍ଷ୍ୟ କରି ସେମାନଙ୍କୁ ଗୁଣିଗାରେଡି ଉପରେ ବିଶ୍ୱାସ କରିବାକୁ ବାଧ୍ୟ କରାଯାଏ। ଯେତେବେଳେ ଜଣେ ବ୍ୟକ୍ତି ମନରେ ଡରର ବସା ବାନ୍ଧିଯାଏ , ସେତେବେଳେ ତାର ଅନ୍ଧବିଶ୍ୱାସ ପ୍ରତି ଭରସା ଆହୁରି ବଢିଯାଏ। ଶିକ୍ଷା, ସ୍ୱାସ୍ଥ୍ୟସେବା ଏବଂ ରୋଜଗାରର ଘୋର ଅଭାବ ଯୋଗୁଁ ନିରୀହ ଲୋକମାନେ ସହଜରେ ଏହି ଭ୍ରାନ୍ତ ଧାରଣାର ଶିକାର ହେଉଛନ୍ତି। ଯଦି ଆମେ ମନରୁ ଅନ୍ଧବିଶ୍ୱାସର ଡର ଦୂର କରିପାରିବା, ତେବେ ଯାଇ ସମାଜରୁ ଏହି ବ୍ୟାଧିକୁ ସମ୍ପୂର୍ଣ୍ଣ ରୂପେ ଦୂର କରାଯାଇପାରିବ।ଏହି କର୍ମଶାଳାରେ ଆଇନଜୀବୀ ସୁନୀଲ କୁମାର ମହାନ୍ତ ଯୋଗଦେଇ ଓଡ଼ିଶା ଡାହାଣୀ ନିର୍ଯାତନା ନିରୋଧ ଆଇନ-୨୦୧୩ ସମ୍ପର୍କରେ ଆଲୋକପାତ କରିଥିଲେ। କେବଳ ଆଇନ ମାଧ୍ୟମରେ ଦଣ୍ଡ ବିଧାନ କରିଦେଲେ ସମାଜ ବଦଳିବ ନାହିଁ। ଏହି ରୋଗ ଓ କୁପ୍ରଥାର ସମାଧାନ ହେଉଛି ଲୋକଙ୍କ ମଧ୍ୟରେ ଥିବା ଭୁଲ୍ ମାନସିକତାକୁ ବଦଳାଇବା। ଲୋକଙ୍କ ମନରେ ଥିବା 'ଡର' ଏବଂ 'ଅନ୍ଧବିଶ୍ୱାସ'କୁ ପ୍ରଥମେ ବାହାର କରିବା । ଜିଲ୍ଲା ପ୍ରଶାସନର ବରିଷ୍ଠ ଅଧିକାରୀମାନେ ଯୋଗଦେଇ କହିଥିଲେ ଆଜିର ଆଧୁନିକ ଯୁଗରେ ମଧ୍ୟ ଡାହାଣୀ ସନ୍ଦେହ ଭଳି ଅନ୍ଧବିଶ୍ୱାସ ସମାଜରେ ରହିବା ଅତ୍ୟନ୍ତ ଦୁର୍ଭାଗ୍ୟଜନକ। ବିଶେଷ କରି ଆଦିବାସୀ ବହୁଳ ଅଞ୍ଚଳରେ ଲୋକଙ୍କୁ ସଚେତନ କରିବା ଏବଂ ଶିକ୍ଷାର ପ୍ରସାର କରିବା ଦ୍ୱାରା ହିଁ ଏହି କୁପ୍ରଥାକୁ ମୂଳୋତ୍ପାଟନ କରାଯାଇପାରିବ। ଡାହାଣୀ ସନ୍ଦେହରେ କାହାକୁ ନିର୍ଯାତନା ଦେଲେ ଓଡ଼ିଶା ଡାହାଣୀ ଶିକାର ନିବାରଣ ଆଇନ ଅନୁଯାୟୀ କଠୋର ଦଣ୍ଡବିଧାନ ରହିଛି। ଜରୁରୀକାଳୀନ ସ୍ଥିତିରେ ମହିଳା ସହାୟତା ପାଇଁ ୧୮୧, ଶିଶୁଙ୍କ ପାଇଁ ୧୦୯୮ ଏବଂ ପୋଲିସ ସହାୟତା ପାଇଁ ୧୧୨ ନମ୍ବରକୁ ଯୋଗାଯୋଗ କରିବାକୁ ଅନୁରୋଧ କରାଯାଇଛି। ଗ୍ରାମାଞ୍ଚଳରେ ଅଙ୍ଗନୱାଡି କର୍ମୀ, ଆଶା କର୍ମୀ ଏବଂ ସ୍ୱେଚ୍ଛାସେବୀ ଅନୁଷ୍ଠାନଗୁଡ଼ିକ ଏହି ସଚେତନତା ବାର୍ତ୍ତା ଘରେ ଘରେ ପହଞ୍ଚାଇବାକୁ ଗୁରୁତ୍ୱ ଦିଆଯାଇଥିଲା। ଏହି କାର୍ଯ୍ୟକ୍ରମରେ ସ୍ୱୟଂ ସହାୟକ ଗୋଷ୍ଠୀ ମହିଳା, ଆଶା ଓ ଅଙ୍ଗନୱାଡ଼ି କର୍ମୀ, ଜିଲ୍ଲାର ବିଭିନ୍ନ ବ୍ଲକରୁ ସିଡିପିଓ, ସୁପରଭାଇଜର ଏବଂ ବିଭିନ୍ନ ସାମାଜିକ ସଙ୍ଗଠନର କର୍ମକର୍ତ୍ତାମାନେ ଅଂଶଗ୍ରହଣ କରିଥିଲେ। ଜିଲ୍ଲାସମାଜ ମଙ୍ଗଳ ବିଭାଗର କର୍ମଚାରୀମାନେ କାର୍ଯ୍ୟକ୍ରମ ପରିଚାଳନା କରିଥିଲେ।
ଖଣ୍ଡାଧାର ନିଉଜ- ବରିଷ୍ଠ ସାମ୍ବାଦିକ ଦିଲ୍ଲିପ କୁମାର ସାହୁଙ୍କ ରିପୋର୍ଟ।
