ఏపీ వెల్త్ ఫండ్ పేరుతో ఒక వినూత్న ప్రతిపాదనను తెరపైకి.....
ఏపీ వెల్త్ ఫండ్ … గేమ్ ఛేంజర్ ఆలోచన!
ఆంధ్రప్రదేశ్ ప్రభుత్వం 2026-27 వార్షిక బడ్జెట్లో ఏపీ వెల్త్ ఫండ్ పేరుతో ఒక వినూత్న ప్రతిపాదనను తెరపైకి తెచ్చింది. రాష్ట్ర ఆర్థిక వ్యవస్థను సమూలంగా మార్చేసే గేమ్ ఛేంజర్ గా దీనిని అభివర్ణిస్తున్నారు. కానీ చాలా మందికి ఈ వెల్త్ ఫండ్ అంటే ఏమిటో అర్థం కావడం లేదు.
ఏపీ వెల్త్ ఫండ్ అంటే ఏమిటి?
సాధారణంగా దేశాలు తమ వద్ద ఉన్న అదనపు ఆదాయాన్ని లేదా విదేశీ మారక నిల్వలను భవిష్యత్తు అవసరాల కోసం పెట్టుబడిగా పెట్టేందుకు సావరిన్ వెల్త్ ఫండ్స్ ఏర్పాటు చేస్తాయి. ఇదే నమూనాను స్ఫూర్తిగా తీసుకుని, ఆంధ్రప్రదేశ్ ప్రభుత్వం రాష్ట్ర స్థాయిలో ఈ వెల్త్ ఫండ్ ను ప్రతిపాదించింది. అంటే, కేవలం అప్పుల మీద ఆధారపడకుండా, రాష్ట్రం తనకంటూ సొంతంగా ఆస్తులను, ఆదాయ వనరులను సృష్టించుకుని, వాటి ద్వారా వచ్చే లాభాలతో రాష్ట్రాన్ని నడిపించాలనేది దీని ప్రధాన ఉద్దేశ్యం.
నిధుల సమీకరణకు ప్లాన్
ప్రభుత్వం ఈ నిధిని రూ. 100 కోట్ల ప్రాథమిక మూలధనం తో ప్రారంభించనుంది. అయితే ఇది కేవలం ప్రారంభం మాత్రమే. ఈ ఫండ్లోకి ప్రైవేటు ఈక్విటీ భాగస్వాములను, అంతర్జాతీయ పెట్టుబడిదారులను ఆహ్వానిస్తారు. ప్రభుత్వ భూములు, ఇతర ఆస్తులను ఈ ఫండ్లో భాగంగా చూపిస్తూ, వాటి ద్వారా పెట్టుబడులు ఆకర్షిస్తారు. ఇలా సేకరించిన నిధులను మౌలిక సదుపాయాల కల్పన, డీప్ టెక్, ఆర్టిఫిషియల్ ఇంటెలిజెన్స్ వంటి భవిష్యత్తు రంగాల్లో పెట్టుబడిగా పెడతారు. దీని ద్వారా వచ్చే డివిడెండ్లు లేదా లాభాలను తిరిగి రాష్ట్ర అభివృద్ధికి, ప్రజా సంక్షేమ పథకాలకు ఖర్చు చేస్తారు.
దీర్ఘ కాలికంగా లాభం
ముఖ్యమంత్రి చంద్రబాబు నాయుడు ఆలోచన ప్రకారం.. ప్రభుత్వం కేవలం పన్నుల మీద మాత్రమే ఆధారపడకూడదు, ఒక వ్యవస్థాపకుడిలా ఆలోచించి సంపద సృష్టి చేయాలి. ఒక కుటుంబం-ఒక వ్యవస్థాపకుడు అనే నినాదంతో ప్రతి ఇంటికీ ఆదాయం పెరగాలని, అదే సమయంలో రాష్ట్రానికీ శాశ్వత ఆదాయ వనరు ఉండాలని ప్రభుత్వం భావిస్తోంది. ఐటీ రంగంలో గతంలో వచ్చిన సంస్కరణల ఫలితాలు ఇప్పుడు అనుభవిస్తున్నట్లుగానే, ఈ వెల్త్ ఫండ్ వల్ల వచ్చే 10-15 ఏళ్లలో ఆంధ్రప్రదేశ్ ఆర్థికంగా స్వయంసమృద్ధి సాధిస్తుందని ప్రభుత్వం బలంగా నమ్ముతోంది.
అమలులో ఎన్నో సవాళ్లు
భారతదేశంలో ఒక రాష్ట్ర ప్రభుత్వం ఇటువంటి సాహసోపేతమైన అడుగు వేయడం ఇదే మొదటిసారి. అంతర్జాతీయంగా నార్వే వంటి దేశాల్లో ఇది సూపర్ హిట్ అయినప్పటికీ, ఆంధ్రప్రదేశ్ వంటి లోటు బడ్జెట్ ఉన్న రాష్ట్రంలో దీని అమలు సవాలుతో కూడుకున్నది. అమరావతి, విశాఖ వంటి నగరాల్లో ఉన్న ప్రభుత్వ భూముల విలువ పెరగడం, పారదర్శకమైన పెట్టుబడి విధానాలు ఉంటే ప్రైవేటు సంస్థలు ఆసక్తి చూపే అవకాశం ఉంది. అయితే రాష్ట్రం ఇప్పటికే భారీ అప్పుల్లో ఉండటం, రాజకీయ స్థిరత్వంపై పెట్టుబడిదారుల అంచనాలు ఈ ఫండ్ విజయాన్ని శాసిస్తాయి. కేవలం వంద కోట్లతో మొదలై వేల కోట్లకు చేరాలంటే పక్కా ప్రణాళిక, నిపుణులైన ఫండ్ మేనేజర్లు అవసరం.
