అదానీపై అమెరికా ఉచ్చు – జగన్ రెడ్డి బండారమూ బట్టబయలు!?....
అదానీపై అమెరికా ఉచ్చు – జగన్ రెడ్డి బండారమూ బట్టబయలు!
అమెరికాలో అదానీ గ్రూప్పై జరుగుతున్న న్యాయపరమైన పరిణామాలు ఇప్పుడు భారత రాజకీయాల్లో, ముఖ్యంగా ఆంధ్రప్రదేశ్లో ప్రకంపనలు సృష్టించడం ఖాయంగా కనిపిస్తున్నాయి. అమెరికాలోని సెక్యూరిటీస్ అండ్ ఎక్స్ఛేంజ్ కమిషన్, డిపార్ట్మెంట్ ఆఫ్ జస్టిస్ అదానీ గ్రూప్పై మోపిన అభియోగాలు కేవలం ఆర్థికపరమైనవి మాత్రమే కావు రాజకీయ అవినీతిలో కీలకమైనవి.
ఆదాని నుంచి లంచాలు తీసుకున్న జగన్ రెడ్డి?
అమెరికా చట్టాలైన ఫారిన్ కరప్షన్ ప్రాక్టీసెస్ యాక్ట్ ప్రకారం, అమెరికా మార్కెట్ల నుండి నిధులు సేకరించిన ఏ సంస్థ అయినా ఇతర దేశాల్లో లంచాలు ఇవ్వడం తీవ్రమైన నేరం. న్యూయార్క్ కోర్టులో దాఖలైన అభియోగాల ప్రకారం, సౌర విద్యుత్ ఒప్పందాల కోసం అదానీ గ్రూప్ భారత్ లోని రాజకీయ నేతలకు సుమారు రూ.2,100 కోట్లు మేర లంచాలు ఇచ్చినట్లు అమెరికా దర్యాప్తు సంస్థలు ఆరోపిస్తున్నాయి. ఈ భారీ కుంభకోణంలో లబ్ధి పొందిన రాష్ట్రాల్లో ఆంధ్రప్రదేశ్ పేరు ప్రముఖంగా వినిపిస్తుండటం ఇప్పుడు మాజీ సీఎం జగన్ మోహన్ రెడ్డికి ఇబ్బందికరంగా మారింది.
అంతర్జాతీయ మీడియా ఏం చెబుతోంది?
బ్లూమ్బెర్గ్ , రాయిటర్స్ వంటి అంతర్జాతీయ మీడియా సంస్థల నివేదికల ప్రకారం, అదానీ గ్రీన్ ఎనర్జీకి సంబంధించి ఆంధ్రప్రదేశ్ ప్రభుత్వంతో జరిగిన ఒప్పందాల సమయంలో భారీగా నిధుల మళ్లింపు జరిగింది. ముఖ్యంగా, విద్యుత్ కొనుగోలు ఒప్పందాల కోసం నాటి ఏపీ ప్రభుత్వ పెద్దలకు వందల కోట్లు ముట్టాయని ఎఫ్బీఐ సేకరించిన సాక్ష్యాల్లో ఉన్నట్లు వార్తలు వస్తున్నాయి. అమెరికా ఇన్వెస్టర్లను మోసం చేశారనే కోణంలో దర్యాప్తు జరుగుతున్నందున, ఆ లంచాలు ఎవరికి వెళ్లాయనే వివరాలను అమెరికా కోర్టులో బయటపెట్టడం అనివార్యంగా మారుతుంది.
జగన్ రెడ్డి చుట్టూ ఉచ్చు బిగుస్తోందా?:
అదానీ గ్రూప్తో నాటి ఆంధ్రప్రదేశ్ ప్రభుత్వం కుదుర్చుకున్న వివాదాస్పద ఒప్పందాలే ఈ ఆరోపణలకు కేంద్రబిందువు. జగన్ హయాంలో గంగవరం పోర్టు అప్పగింత, సౌర విద్యుత్ కొనుగోలు ఒప్పందాలు అత్యంత వేగంగా, పారదర్శకత లేకుండా జరిగాయని విపక్షాలు మొదటి నుంచీ ఆరోపిస్తున్నాయి. ఒకవేళ అమెరికా దర్యాప్తులో లంచం తీసుకున్న వ్యక్తుల పేర్లు అధికారికంగా బయటకు వస్తే, అది అంతర్జాతీయ స్థాయి నేరంగా మారుతుంది. దీనివల్ల జగన్ రెడ్డికి చట్టపరంగానే కాకుండా, రాజకీయంగా కూడా గడ్డు కాలం మొదలయ్యే అవకాశం ఉంది.
అమెరికా దర్యాప్తు సంస్థల వద్ద సాక్ష్యాలు
అమెరికా దర్యాప్తు సంస్థల దగ్గర ఎలక్ట్రానిక్ సాక్ష్యాలు, ఈమెయిల్స్ , నిధుల బదిలీకి సంబంధించిన పక్కా ఆధారాలు ఉన్నట్లు సమాచారం. ఇవి గనుక బయటకు వస్తే, అదానీ గ్రూప్ నుండి ఎవరెవరి ఖాతాల్లోకి డబ్బు చేరింది, ఏ ఏ బ్రోకర్ల ద్వారా ఈ లావాదేవీలు జరిగాయనేది స్పష్టమవుతుంది. కేవలం రాజకీయ ప్రభావంతో ఇండియాలో కేసుల నుండి తప్పించుకోవడం సులభం కావచ్చు కానీ, అమెరికా చట్టాల నుండి తప్పించుకోవడం దాదాపు అసాధ్యం. అక్కడ నిరూపితమైతే జగన్ రెడ్డికి అంతర్జాతీయ స్థాయిలో ఆస్తుల జప్తి లేదా ప్రయాణ ఆంక్షలు వంటి తీవ్ర పరిణామాలు ఎదురయ్యే ముప్పు ఉంది. అదానీ కేసులో అమెరికా దూకుడు చూస్తుంటే, ఇది కేవలం వ్యాపారవేత్తపై జరుగుతున్న దర్యాప్తుగా మాత్రమే కనిపించడం లేదు. ఇది భారత రాజకీయాల్లోని అవినీతి నెట్వర్క్ను ఛేదించే ఆయుధంగా మారుతోంది. లంచాల ఆరోపణలు వాస్తవమని తేలితే, జగన్ రెడ్డి తన రాజకీయ జీవితంలో అతిపెద్ద సంక్షోభాన్ని ఎదుర్కోవాల్సి ఉంటుంది.
