नवी मुंबई: स्वतःच्याच कौटुंबिक गरजा भागवण्यासाठी एका ३४ वर्षीय तरुणाने ५० हजार रुपयांच्या लुटीचा बनाव रचल्याची धक्कादायक घटना

नवी मुंबई: स्वतःच्याच कौटुंबिक गरजा भागवण्यासाठी एका ३४ वर्षीय तरुणाने ५० हजार रुपयांच्या लुटीचा बनाव रचल्याची धक्कादायक घटना
प्रतिनिधी अनिलराव पाटील

नवी मुंबईत उघडकीस आली आहे. या तरुणाने केवळ खोटा बनावच रचला नाही, तर तो खरा वाटावा यासाठी स्वतःचाच गळा कापून पोलिसांची दिशाभूल करण्याचा प्रयत्न केला. मात्र, पोलिसांच्या सखोल तपासात हा सर्व प्रकार उघड झाला आहे.
नेमकी घटना काय?
नेरूळ परिसरात राहणाऱ्या एका ३४ वर्षीय तरुणाने सानपाडा पोलीस ठाण्यात तक्रार दाखल केली होती. त्याने दावा केला होता की, तो जुईनगर परिसरातून जात असताना सहा अज्ञात इसमांनी त्याला अडवले. त्यांनी त्याच्या गळ्यावर धारदार शस्त्राने वार करून जखमी केले आणि त्याच्याकडील ५० हजार रुपयांची रोकड लुटून नेली. या तक्रारीनंतर पोलिसांनी तातडीने गुन्हा दाखल करून तपास सुरू केला.
पोलिसांचा तपास आणि संशय
गुन्हा दाखल होताच गुन्हे शाखा आणि स्थानिक पोलिसांनी घटनास्थळी धाव घेतली. फॉरेन्सिक टीमनेही पाहणी केली. पोलिसांनी सलग २४ तास परिसरातील सीसीटीव्ही फुटेज तपासले आणि लोकांकडे चौकशी केली. मात्र, तक्रारदाराने वर्णन केलेले कोणतेही वाहन किंवा संशयास्पद हालचाली सीसीटीव्हीमध्ये दिसून आल्या नाहीत. त्यामुळे पोलिसांचा संशय बळावला.
असा झाला उलगडा
तपासात काहीच धागेदोरे हाती न लागल्याने पोलिसांनी तक्रारदार तरुणाचीच कसून चौकशी करण्यास सुरुवात केली. अखेर पोलिसी खाक्यासमोर त्याने आपला गुन्हा कबूल केला. हा तरुण एका कुरिअर कंपनीत कामाला असून, जमा झालेली ५० हजार रुपयांची रोकड त्याच्याकडे होती. घरची आर्थिक गरज भागवण्यासाठी त्याने हे पैसे स्वतःकडेच ठेवण्याचा निर्णय घेतला. कंपनीला काय उत्तर द्यायचे, या विवंचनेतून त्याने लुटीचा हा खोटा बनाव रचला.
जिवावर बेतणारा प्रयत्न
स्वतःचा बनाव खरा वाटावा यासाठी त्याने एका निर्जन ठिकाणी जाऊन स्वतःच्याच गळ्यावर वार केले. सुदैवाने ही जखम जास्त खोल नव्हती, अन्यथा त्याचा जीवही जाऊ शकला असता. जखमी अवस्थेत त्याने रुग्णालयात उपचार घेतले आणि त्यानंतर पोलिसांत तक्रार दाखल केली. मात्र, पोलिसांच्या तत्परतेमुळे हा बनाव फार काळ टिकू शकला नाही.