కన్నీటి సంక్రాంతి: పండగ పూట బకాయిల్లేక పస్తులు.. చక్కెర కార్మికుల ఆకలి కేకలు!

ఉత్తరాంధ్రలోని మూతపడిన తాండవ, ఏటికొప్పాక, చోడవరం, భీమసింగి మరియు సహకార చక్కెర కర్మాగారాల కార్మికులు మరియు ఉద్యోగులు తమ బకాయిలు అందక ఈ సంక్రాంతి పండుగను తీవ్ర విషాదంలో గడుపుతున్నారని లోక్ సత్తా పార్టీ రాష్ట్ర అధ్యక్షుడు భీశెట్టి బాబ్జీ ఆవేదన వ్యక్తం చేశారు.
​శనివారం జామిలో భీమసింగి చక్కెర కర్మాగారం కార్మికులతో కలిసి ఆయన విలేకరులతో మాట్లాడారు. ఈ సందర్భంగా ఆయన మాట్లాడుతూ, కూటమి ప్రభుత్వం అధికారంలోకి వచ్చినప్పటి నుండి ముఖ్యమంత్రి నారా చంద్రబాబు నాయుడుకు అనేక లేఖలు రాసినప్పటికీ, ఇప్పటివరకు ఎలాంటి స్పందన లేదని విమర్శించారు. స్థానిక ఎమ్మెల్యేలు మరియు మంత్రులు రైతులను,కార్మికులను మరియు వారి కుటుంబాలను పట్టించుకోవడంలో విఫలమయ్యారని ఆయన ఆరోపించారు.
​బకాయిల వివరాలు:
​తాండవ చక్కెర కర్మాగారం: 361 కార్మిక కుటుంబాలకు రూ. 12 కోట్లు బకాయి ఉంది.
​ఏటికొప్పాక కర్మాగారం: 386 కుటుంబాలకు రూ. 13 కోట్లు బకాయి ఉంది.
​చోడవరం కర్మాగారం: 341 కుటుంబాలకు రూ. 7 కోట్లు బకాయి ఉంది. అంతేకాకుండా, ఈ ఫ్యాక్టరీ రైతులకే రూ. 28 కోట్లు బకాయి పడింది.​భీమసింగి కర్మాగారం: 279 కుటుంబాలకు రూ. 9 కోట్లు బకాయి ఉంది.
​గత ఐదేళ్లుగా భీమసింగి చక్కెర కర్మాగారం మూతపడటంతో, ఆర్థిక ఇబ్బందులు మరియు ఆందోళనల కారణంగా చాలా మంది కార్మికులు మరణించారని బాబ్జీ గుర్తు చేశారు. ప్రభుత్వం తక్షణమే స్పందించి ఈ ఐదు సహకార చక్కెర కర్మాగారాలను పునరుద్ధరించకపోతే, లోపల ఉన్న యంత్రాలన్నీ తుప్పు పట్టి పాడైపోతాయని హెచ్చరించారు. జిల్లా మంత్రి కొండపల్లి శ్రీనివాస్ మరియు స్థానిక ఎమ్మెల్యేలు జోక్యం చేసుకుని భీమసింగి కార్మికుల బకాయిలను వెంటనే చెల్లించాలని ఆయన కోరారు.
​ఈ సమావేశంలో ఫ్యాక్టరీ కార్మికులు షిర్రెడ్డి ఎర్నాయుడు, సిరికి వెంకటరావు, రమణ, భీశెట్టి అధిబాబు తదితరులు పాల్గొన్నారు.