ମକର ସଂକ୍ରାନ୍ତି ଉପଲକ୍ଷେ ଘଟଗାଁରେ ଆଦିବାସୀ ସାନ୍ତାଳୀ ନୃତ୍ୟର ଆକର୍ଷଣ

ଘଟଗାଁ:୧୬/୦୧(ସମ୍ବିତ କୁମାର ସାହୁ) - ପବିତ୍ର ମକର ସଂକ୍ରାନ୍ତି ଅବସରରେ କେନ୍ଦୁଝର ଜିଲ୍ଲାର ପ୍ରସିଦ୍ଧ ତୀର୍ଥସ୍ଥଳ ଘଟଗାଁ ଅଞ୍ଚଳରେ ଆଦିବାସୀ ସଂସ୍କୃତିର ଅନନ୍ୟ ଦୃଶ୍ୟ ଦେଖିବାକୁ ମିଳିଛି। ମକର ସଂକ୍ରାନ୍ତି ଉପଲକ୍ଷେ ହରିଡାଗୋଠା ଓ ହରିଚନ୍ଦନପୁର ଅଞ୍ଚଳରୁ ଆସିଥିବା ଆଦିବାସୀ ସାନ୍ତାଳ ସମୁଦାୟର  ପାରମ୍ପରିକ ସାନ୍ତାଳୀ ନୃତ୍ୟ ପ୍ରଦର୍ଶନ କରି ଉତ୍ସବକୁ ଆହୁରି ରଙ୍ଗିନ କରିଥିଲେ।
ପାରମ୍ପରିକ ବାଦ୍ୟ ‘ମାଦଳ’, ‘ତାମାକ’ ଓ ‘ଧୋଲ’ର ତାଳେ ତାଳେ ହୋଇଥିବା ସାନ୍ତାଳୀ ନୃତ୍ୟ ଦେଖି ଦର୍ଶକମାନେ ମନମୁଗ୍ଧ ହୋଇଥିଲେ। ରଙ୍ଗିନ ପାରମ୍ପରିକ ପୋଶାକ, ପାଉଁଜି ଓ ମୁଣ୍ଡ ଶୋଭା ସହ ନୃତ୍ୟରେ ଆଦିବାସୀ ଜୀବନଶୈଳୀ, ପ୍ରକୃତି ପ୍ରେମ ଓ ସାମୁହିକ ଏକତାର ସୁନ୍ଦର ପ୍ରତିଫଳନ ଦେଖାଯାଇଥିଲା।
ମକର ସଂକ୍ରାନ୍ତି ଆଦିବାସୀ ସମୁଦାୟ ପାଇଁ କେବଳ ଧାର୍ମିକ ପର୍ବ ନୁହେଁ, ବରଂ ନୂତନ ଫସଲ, ସୁଖ-ସମୃଦ୍ଧି ଓ ସାମାଜିକ ମିଳନର ପ୍ରତୀକ। ଏହି ଅବସରରେ ସାନ୍ତାଳୀ ନୃତ୍ୟ ମାଧ୍ୟମରେ ନିଜ ସଂସ୍କୃତିକୁ ସୁରକ୍ଷିତ ରଖିବା ସହ ନବ ପିଢିକୁ ପାରମ୍ପରିକ ମୂଲ୍ୟବୋଧ ସହ ଯୋଡ଼ିବାର ପ୍ରୟାସ ଦେଖାଯାଇଛି।
ଘଟଗାଁରେ ଆସିଥିବା ହଜାରହଜାର ଶ୍ରଦ୍ଧାଳୁ ଓ ପର୍ଯ୍ୟଟକ ଏହି ସାନ୍ତାଳୀ ନୃତ୍ୟକୁ ଉପଭୋଗ କରି ଆଦିବାସୀ କଳା-ସଂସ୍କୃତି ପ୍ରତି ଆଦର ପ୍ରକାଶ କରିଥିଲେ। ଏଭଳି କାର୍ଯ୍ୟକ୍ରମ ମାଧ୍ୟମରେ ଓଡ଼ିଶାର ଗ୍ରାମୀଣ ଓ ଆଦିବାସୀ ସଂସ୍କୃତିକୁ ଜାତୀୟ ସ୍ତରରେ ପରିଚିତ କରାଇବାରେ ସହାୟକ ହେଉଛି।

✍️ ସମ୍ବାଦଦାତା: ସମ୍ବିତ କୁମାର ସାହୁ (ଘଟଗାଁ, କେନ୍ଦୁଝର)
📞 ମୋବାଇଲ୍: ୯୧୭୮୨୭୩୫୬୯