ବଡ଼ଘାଗରାରେ ଶୌଚାଳୟ ଥିଲେ ମଧ୍ୟ ବ୍ୟବହାରଯୋଗ୍ୟ ନୁହେଁ, ମହିଳା ପର୍ଯ୍ୟଟକ ଚରମ ଅସୁବିଧାର ସମ୍ମୁଖୀନ ହେଉଛନ୍ତି।

କେନ୍ଦୁଝର ଜିଲ୍ଲାର ପ୍ରସିଦ୍ଧ ପର୍ଯ୍ୟଟନ ସ୍ଥଳ ବଡ଼ଘାଗରା ଜଳପ୍ରପାତ ଓ ପ୍ରାକୃତିକ ସୌନ୍ଦର୍ଯ୍ୟ ପାଇଁ ରାଜ୍ୟସ୍ତରରେ ପରିଚିତ। ପ୍ରତିଦିନ ଶତାଧିକ ପର୍ଯ୍ୟଟକ ଏଠାକୁ ଆସୁଥିବା ବେଳେ, ମୌଳିକ ସୁବିଧାର ଭୟଙ୍କର ଅଭାବ ପର୍ଯ୍ୟଟନ ଉନ୍ନତିକୁ ପ୍ରଶ୍ନର ସମ୍ମୁଖୀନ କରୁଛି। ବଡ଼ଘାଗରା ପରି ଏକ ପ୍ରମୁଖ ପର୍ଯ୍ୟଟନ କେନ୍ଦ୍ରରେ ଲେଡିଜ୍ ଓ ଜେଣ୍ଟ୍ସ ପାଇଁ ଶୌଚାଳୟ ନିର୍ମାଣ ହୋଇଥିଲେ ମଧ୍ୟ ସେଗୁଡ଼ିକ ଦୀର୍ଘ ଦିନ ହେବା ସତ୍ତ୍ୱେ ବ୍ୟବହାରଯୋଗ୍ୟ ହୋଇପାରୁନାହାନ୍ତି।
ସ୍ଥଳୀୟ ତଦନ୍ତରେ ଦେଖାଯାଉଛି ଯେ ଶୌଚାଳୟ ଭିତରେ ପାଣି ସୁବିଧା ନାହିଁ, ଦ୍ୱାର ଭାଙ୍ଗିଯାଇଛି, ଲକ୍ ନଷ୍ଟ ହୋଇଛି ଓ ସଫାସୁଫାଇର ସଠିକ୍ ବ୍ୟବସ୍ଥା ନଥିବାରୁ ଭିତରେ ଦୁର୍ଗନ୍ଧ ପସରି ରହିଛି। ଏହି କାରଣରୁ ପର୍ଯ୍ୟଟକମାନେ ଶୌଚାଳୟ ବ୍ୟବହାର କରିବାକୁ ଭୟ କରୁଛନ୍ତି। ବିଶେଷକରି ମହିଳା, ବୃଦ୍ଧ ଓ ଶିଶୁମାନଙ୍କ ପାଇଁ ଏହା ଗଭୀର ସମସ୍ୟା ସୃଷ୍ଟି କରୁଛି।
ଦୂରଦୂରାନ୍ତରୁ ପରିବାର ସହ ଆସୁଥିବା ମହିଳା ପର୍ଯ୍ୟଟକମାନେ କହିଛନ୍ତି ଯେ ଶୌଚାଳୟ ବ୍ୟବହାର କରିପାରୁନଥିବାରୁ ସେମାନେ ମାନସିକ ଚାପ ଓ ଲଜ୍ଜାର ସମ୍ମୁଖୀନ ହେଉଛନ୍ତି। କେତେକ ମହିଳା ପର୍ଯ୍ୟଟକ ଅସୁବିଧା ହେତୁ ଅଧା ରାସ୍ତାରୁ ଫେରିଯିବାକୁ ବାଧ୍ୟ ହେଉଛନ୍ତି। ଏହା ନାରୀ ସୁରକ୍ଷା ଓ ସ୍ୱଚ୍ଛତା ଅଭିଯାନ ପାଇଁ ଏକ ଗଭୀର ପ୍ରଶ୍ନ ଉଠାଉଛି।
ସରକାର ପକ୍ଷରୁ ପର୍ଯ୍ୟଟନ ଉନ୍ନତି ନାମରେ ଲକ୍ଷାଧିକ ଟଙ୍କା ଖର୍ଚ୍ଚ ହୋଇଥିବା ବେଳେ, ମୌଳିକ ସୁବିଧା ଯଥା ଶୌଚାଳୟ ଭଳି ବିଷୟରେ ଏପରି ଅବହେଳା ଅତ୍ୟନ୍ତ ଦୁଃଖଦ। ସ୍ଥାନୀୟ ଲୋକମାନେ କହୁଛନ୍ତି ଯେ ବାରମ୍ବାର ଅଭିଯୋଗ ହେଲେ ମଧ୍ୟ ସମ୍ପୃକ୍ତ ବିଭାଗ ପକ୍ଷରୁ କୌଣସି ସ୍ଥାୟୀ ପଦକ୍ଷେପ ନିଆଯାଉନାହିଁ।
ପର୍ଯ୍ୟଟକମାନଙ୍କ ମତାନୁସାରେ ଯଦି ଶୀଘ୍ର ଶୌଚାଳୟ ମରାମତି, ପାଣି ସୁବିଧା, ସଫାସୁଫାଇ ଓ ନିୟମିତ ରକ୍ଷଣାବେକ୍ଷଣ କରାଯାଏ ନାହିଁ, ତେବେ ବଡ଼ଘାଗରାର ପର୍ଯ୍ୟଟନ ଖ୍ୟାତି ଭବିଷ୍ୟତରେ ଗଭୀର ଭାବେ ପ୍ରଭାବିତ ହେବ। ସାଧାରଣ ଜନତା ଓ ପର୍ଯ୍ୟଟକମାନେ ପ୍ରଶାସନଙ୍କୁ ଦାବି କରିଛନ୍ତି ଯେ ଶୀଘ୍ର ଏହି ସମସ୍ୟାର ସ୍ଥାୟୀ ସମାଧାନ କରାଯାଉ ଏବଂ ଶୌଚାଳୟକୁ ପୂର୍ଣ୍ଣରୂପେ କାର୍ଯ୍ୟକ୍ଷମ କରାଯାଉ।