युवकांनी संवैधानिक साक्षर होणे काळाची गरज: डॉ. अनिल बनसोड.

रिसोड (प्रतिनिधी):
उत्तमचंद बगडिया महाविद्यालयात 'लोकशाही मूल्ये' विषयावर कार्यशाळा संपन्न. "भारतीय संविधानाने आपल्याला केवळ नागरिक म्हणून अधिकारच दिले नाहीत, तर एक प्रगल्भ आणि सुसंस्कृत जीवनपद्धती बहाल केली आहे. स्वातंत्र्य, समता, बंधुता आणि न्याय हे लोकशाहीचे चार मुख्य स्तंभ असून, या मूल्यांची जोपासना करणे हे प्रत्येक भारतीय नागरिकाचे नैतिक कर्तव्य आहे," असे प्रतिपादन आर्य कॉलेज, वाशिम येथील अर्थशास्त्र विभाग प्रमुख डॉ. अनिल बनसोड यांनी केले.
स्थानिक के.एम.बी.बी.एम. सोसायटीद्वारे संचलित, उत्तमचंद बगडिया कला व वाणिज्य महाविद्यालय येथे 'संविधान जाणीव' जागृती मोहिमेअंतर्गत "भारतीय संविधानातील लोकशाही मूल्ये" या विषयावर एकदिवसीय कार्यशाळेचे आयोजन करण्यात आले होते. याप्रसंगी मुख्य मार्गदर्शक म्हणून ते बोलत होते.
कार्यक्रमाचे स्वरूप आणि उद्घाटन
सदर कार्यशाळा संत गाडगे बाबा अमरावती विद्यापीठाचे डॉ. आंबेडकर अभ्यास केंद्र, महाविद्यालयाचा आयक्यूएसी (IQAC) विभाग आणि राज्यशास्त्र विभाग यांच्या संयुक्त विद्यमाने पार पडली. कार्यक्रमाच्या अध्यक्षस्थानी संस्थेचे अध्यक्ष मा. श्री. उत्तमचंदजी बगडिया होते. प्रमुख पाहुणे म्हणून संस्थेचे सचिव मा. श्री. विठ्ठलराव वसू आणि महाविद्यालयाचे प्राचार्य डॉ. विनोद कुलकर्णी यांची सन्माननीय उपस्थिती होती.
संवैधानिक साक्षरतेवर भर
आपल्या अभ्यासपूर्ण व्याख्यानात डॉ. बनसोड यांनी संविधानाच्या उद्देशिकेतील (Preamble) शब्दांचा सखोल अर्थ उलगडून सांगितला. ते म्हणाले की, "आजच्या जागतिकीकरणाच्या आणि माहिती तंत्रज्ञानाच्या युगात लोकशाहीचे अस्तित्व टिकवून ठेवण्यासाठी तरुणांनी केवळ पदवीधर न होता 'संवैधानिक साक्षर' होणे आवश्यक आहे." यावेळी त्यांनी संविधानातील कलम ३९-ए (समान न्याय आणि मोफत कायदेशीर मदत) यासारख्या तरतुदींचा संदर्भ देत सामाजिक न्यायाची संकल्पना विद्यार्थ्यांना सोप्या भाषेत पटवून दिली.
नियोजन आणि उपस्थिती
कार्यक्रमाच्या प्रारंभी राज्यशास्त्र विभाग प्रमुख डॉ. प्रमोदकुमार नांदेश्वर यांनी प्रास्ताविकातून कार्यशाळेच्या आयोजनामागची भूमिका स्पष्ट केली. या उपक्रमाच्या यशस्वीतेसाठी डॉ. एम. पी. खेडेकर, डॉ.जे.एस. मेश्राम, डॉ.के.के. बुधवंत व श्री.ओंकार पुरी यांच्यासह आयोजन समितीने अथक परिश्रम घेतले.
कार्यक्रमाचे सूत्रसंचालन कु. वैष्णवी घोडेकर हिने केले, तर उपस्थितांचे आभार कु.मेघा इंगळे हिने मानले. या कार्यशाळेला डॉ. ए.जी. वानखडे, प्रा. एस.व्ही.टिकार, प्रा.एस.बी.पांढरे, प्रा.संदिप जुनघरे,प्रा.विनोद राऊत, प्रा. पुजा पाठक, प्रा. राम जुनघरे, प्रा. निलेश बाजड, प्रा.अमरदीप साबळे, प्रा. श्वेता बोंडे, प्रा.विठ्ठल वाघ, प्रा.डॉ. मनोज नरवाडे, डॉ. काळे, प्रा. मनवर, प्रा. प्रजापती श्री. ओंकार पुरी, श्री. संतोष घुगे, श्री.गोपाल कोल्हे व सुरज, ऋषी यांच्यासह शिक्षकेतर कर्मचारी आणि विद्यार्थी मोठ्या संख्येने उपस्थित होते. सामूहिक पसायदानाने या प्रेरणादायी कार्यशाळेची सांगता करण्यात आली.