🔥 विशेष बातमी: सदलगा परिसरात खासगी सावकाराचा 'तालिबानी' धुमाकूळ!

स्वतःची बेकायदेशीर 'फायनान्स कंपनी' थाटून गरिबांची लूट; २० टक्के व्याजाचा फास!

सदलगा / विशेष प्रतिनिधी:


सदलगा पोलीस ठाण्याच्या हद्दीत एका माजलेल्या खासगी सावकाराने सामान्य जनतेचे जगणे हराम केले असून, स्वतःची फायनान्स कंपनी उघडून गरिबांच्या रक्तावर आपली संपत्ती उभी करण्याचा सपाटा लावला आहे. महिन्याला चक्क २० टक्के व्याजाची आकारणी करून हा सावकार अनेकांचे संसार उघड्यावर आणत आहे. धक्कादायक बाब म्हणजे, या जाचाला कंटाळून अनेक पीडित आता आत्महत्येसारखे टोकाचे पाऊल उचलण्याच्या तयारीत आहेत.
मिळालेल्या माहितीनुसार, या सावकाराने अधिकृत फायनान्स कंपनीचा बुरखा पांघरला असला, तरी आतून मात्र काळ्या पैशाचा आणि अव्वाच्या सव्वा व्याजाचा धंदा सुरू आहे. गरजू लोकांना तातडीने पैसे देण्याचे आमिष दाखवून त्यांच्याकडून कोरे चेक, मालमत्तेची कागदपत्रे, कोरे स्टॅम्प आणि दागिने गहाण ठेवून घेतले जातात. एकदा का कोणी याच्या जाळ्यात अडकले की, त्याला व्याजाच्या चक्रव्यूहात असे अडकवले जाते की त्याची सुटका मरेपर्यंत होत नाही.

हा महाभाग केवळ व्याजावरच थांबलेला नाही, तर चांदी व्यापाराच्या नावाखाली महिलांची मोठी फसवणूक करत असल्याचे समोर येत आहे. महिलांना जादा परताव्याचे किंवा स्वस्त चांदीचे आमिष दाखवून त्यांच्याकडून मोठी रक्कम उकळली जात आहे. दोन नंबरच्या कमाईतून या सावकाराने अल्पावधीत अफाट शेतीवाडी आणि बेसुमार संपत्ती जमा केली आहे. या संपत्तीची चौकशी केल्यास मोठे घबाड बाहेर येण्याची शक्यता आहे.

"सावकाराने आमची जमीन लाटली, कोरे चेक घेऊन कोरे स्टॅम्प घेऊन आम्हाला धमकावले जात आहे," अशा व्यथा अनेक पीडितांनी नाव न सांगण्याच्या अटीवर मांडल्या आहेत. जर या सावकारावर तातडीने कारवाई झाली नाही, तर सदलगा परिसरात मोठी दुर्दैवी घटना घडण्याची शक्यता नाकारता येत नाही.

📢 सदलगा पोलीस प्रशासन या सावकाराला अभय का देत आहे?

एका रात्रीत श्रीमंत होणाऱ्या या सावकाराच्या अफाट संपत्तीची 'ईडी' किंवा 'आयकर विभाग' चौकशी करणार का?

पीडितांनी आत्महत्या केल्यावरच पोलीस जागे होणार का?

🚨 जर या सावकाराचा बंदोबस्त तातडीने केला नाही आणि पीडितांना त्यांचे चेक किंवा कागदपत्रे परत मिळाली नाहीत, तर 'गीता संघर्ष न्यूज' या सावकाराचे नाव आणि त्याच्या काळ्या धंद्याचे सर्व पुरावे पुराव्यासहित जाहीर करेल!