बुलढाण्यात भीषण अपघात! तीन जीवलग मित्रांचा एकत्र अंत..

बुलढाणा: बुलढाणा जिल्ह्यात एकापाठोपाठ एक जणू काही अपघाताची स्पर्धाच लागली आहे का, ही विचारण्याची वेळ आली आहे. आज 5 जानेवारी रोजी साधारणत: संध्याकाळी चार ते पाच वाजेच्या दरम्यान दुपारी बुलढाण्यात एक मोठी दुर्घटना घडली.ती देखील दुचाकी आणि एसटी बसमध्ये, हा अपघात इतका भयानक होता की सर्व काही स्तब्ध होऊन गेले. मुख्य म्हणजे या अपघातात मृतांच्या शरीराचे अक्षरश: तुकडे झाले आहेत. या अपघाताने बुलढाणा हादरुन गेले आहे.

बुलढाण्यात दिवसागणिक अपघातात वाढ होत असून आज दुपारी एक भीषण अपघात होऊन ट्रिपल सीट सुसाट वेग असलेल्या बाईकस्वारांना जीव गमवावा लागला आहे. छत्रपती संभाजीनगरकडून धाडकडे जाणाऱ्या राज्य परिवहन महामंडळाच्या एसटी बसखाली चिरडले गेल्याने या तिघांचा घटनास्थळीच मृत्यू झाल्याची दुर्दैवी घटना 5 जानेवारीला संध्याकाळी 4 ते 5 वाजेच्या दरम्यान करडीच्या (धाड) पुलावर घडली. अपघात इतका भीषण होता की, यातील एकाच्या डोक्याची कवटी फुटून त्यांच्या मेंदूचा अक्षरशः चेंदामेंदा झाला.

मलकापूर आगाराची बस क्रमांक एमएच - 06 - बीडब्ल्यू - 3638 क्रमांकाची एसटी बस छत्रपती संभाजीनगरवरुन मलकापूरला जात होती. तर ढालसावंगी तालुका बुलढाणा येथील अंकुश पाडळे, रवी चंदनशे आणि कैलास शिंदे हे तिघे मित्र मोटारसायकलवर स्वार होऊन धाडवरून कराडीच्या दिशेने जात होते. सदर बस सायंकाळी 4 ते 5 वाजेच्या दरम्यान करडी (धाड) येथील पुलावर येताच या दोन्ही वाहनांमध्ये समोरासमोर जोरदार धडक झाली.

दुचाकी ही बसखाली अडकली आणि फरफटत गेली. यामध्ये दुचाकीस्वारांना गंभीर मार लागून त्यांचा घटनास्थळीच मृत्यू झाल्याची माहिती आहे. हा अपघात इतका भयंकर होता की, यातील एकाच्या डोक्याची कवटी फुटून त्याचा मेंदू बाहेर पडला. या दुर्दैवी घटनेमुळे ढालसावंगी गावावर दु:खाची लाट पसरली. घटनास्थळी नागरिकांनी या घटनेची माहिती वाऱ्यासारखी पसरल्यानंतर परिसरातील नागरिकांनी एकच गर्दी केली होती.