प्रताप महाविद्यालयाच्या मैदानावर पोलीस संघाची बाजी; पत्रकार संघावर मात

प्रताप महाविद्यालयाच्या मैदानावर पोलीस संघाची बाजी; पत्रकार संघावर मात


१६८ धावांचे आव्हान अपुरे; पोलीस संघाची भेदक गोलंदाजी ठरली निर्णायक


अमळनेर प्रतिनिधी
महाराष्ट्र पोलीस स्थापना दिवस आणि पत्रकार दिनाचे औचित्य साधून पोलीस प्रशासन व महाराष्ट्र राज्य पत्रकार संघ यांच्या संयुक्त विद्यमाने प्रताप महाविद्यालयाच्या मैदानावर आयोजित करण्यात आलेल्या मैत्रीपूर्ण क्रिकेट सामन्यात पोलीस संघाने दणदणीत विजय मिळवला. या मैत्रीपूर्ण झालेल्या या सामन्यात पोलीस संघाने पत्रकार संघावर मात करत विजयाची मोहोर उमटवली.

पोलीस संघाचे कर्णधार उपविभागीय पोलीस अधिकारी विनायक कोते यांनी नाणेफेक जिंकून प्रथम फलंदाजीचा निर्णय घेतला.प्रथम फलंदाजीस पोलीस निरीक्षक दत्तात्रेय निकम आणि पोकॉ प्रल्हाद सूर्यवंशी मैदानात उतरले. पत्रकार संघाच्या आर. जे. पाटील यांनी निकम यांची महत्त्वपूर्ण विकेट घेत सुरुवातीला पोलीस संघाला धक्का दिला. मात्र, त्यानंतर प्रल्हाद सूर्यवंशी यांनी मैदानाचा ताबा घेतला. त्यांना पीएसआय समाधान गायकवाड यांनी ४९ धावा करत उत्तम साथ दिली. सूर्यवंशी यांनी प्रताप महाविद्यालयाच्या मैदानात चौफेर फटकेबाजी करत नाबाद ८२ धावा केल्या आणि आपल्या संघाला १६८ धावांच्या भक्कम धावसंख्ये पर्यंत पोहोचवले.

१६८ धावांच्या मोठ्या लक्षाचा पाठलाग करताना पत्रकार संघाकडून महेंद्र पाटील व उमेश काटे यांनी डावाची सावध सुरुवात केली. त्यानंतर आर. जे. पाटील, प्रविण बैसाणे, मुन्ना शेख, राहुल भदाणे, किरण पाटील, निरंजन पेंढारे, गणेश चव्हाण,कमलेश वानखेडे, रिजवान मणियार यांनी फटकेबाजीचा प्रयत्न केला. परंतु पोलीस संघाचे गोलंदाज डि.वाय.एस.पी विनायक कोते,पी.आय दत्तात्रय निकम, पो. कॉ.शेखर साळुंखे, मंगल भोई, मयूर पाटील, विनोद संदानशिव आणि चरण पाटील यांच्या शिस्तबद्ध आणि भेदक माऱ्यापुढे पत्रकार संघाची फलंदाजी कोसळली. उत्कृष्ट क्षेत्ररक्षण आणि अचूक गोलंदाजीमुळे पोलीस संघाने या सामन्यावर विजय मिळविला.

उत्कृष्ट फलंदाजीबद्दल प्रल्हाद सूर्यवंशी यांना 'मॅन ऑफ द मॅच' तर अचूक टप्प्यावर गोलंदाजी केल्याबद्दल राहुल पाटील यांना 'उत्कृष्ट गोलंदाज'तर उत्कृष्ट कॅच मंगल भोई यांचा गौरवण्यात आले. सुरुवातीला क्रिकेट कोच रिंकू पवार यांनी दोन्ही संघांना खेळाचे नियम समजावून सांगितले.

या मैत्रीपूर्ण सामन्याचा आनंद घेण्यासाठी माजी मंत्री तथा विद्यमान आमदार अनिल पाटील यांनी विशेष उपस्थिती लावून खेळाडूंचे कौतुक करून उत्साह वाढला. सामन्याचे पंच म्हणून एस.पी. वाघ, रिंकू पवार, सुफियान तेली, सय्यद अबुजर यांनी काम पाहिले. श्लोक बागुल यांनी स्कोरर म्हणून तर संजय पाटील यांनी आपल्या सूत्रसंचालनातून उपस्थितांची मने जिंकली.
याप्रसंगी सपोनि जीभाऊ पाटील,फिरोज बागवान, महा राज्य पत्रकार संघाचे तालुका अध्यक्ष डॉ. समाधान मैराळे, सुरेश कांबळे, प्रा.डॉ विजय गाढे, नूर खान,आत्माराम अहिरे, मिलिंद पाटील, पो. हेड.सिद्धांत सिसोदे, पो.हेड मिलिंद सोनार यांच्यासह पोलीस व पत्रकार बांधव मोठ्या संख्येने उपस्थित होते.