મુખ્યમંત્રી ભુપેન્દ્રભાઈ પટેલે સંતોકબા ધોળકિયા વિદ્યાલય, ડાંગના વિદ્યાર્થીઓ સાથે સંવાદ કર્યો

મુખ્યમંત્રી ભુપેન્દ્રભાઈ પટેલે સંતોકબા ધોળકિયા વિદ્યાલય, ડાંગના વિદ્યાર્થીઓ સાથે સંવાદ કર્યો
ડાંગ | તારીખ: 02/01/2026
ભારતના ગુજરાત રાજ્યના ડાંગ જિલ્લામાં આવેલ પ્રયોશા પ્રતિષ્ઠાન ડાંગ સંચાલિત સંતોકબા ધોળકિયા વિદ્યાલય, માળેવામ, ડાંગના ધોરણ-10ના વિદ્યાર્થીઓએ શૈક્ષણિક પ્રવાસ અંતર્ગત ગાંધીનગર સ્થિત સ્વર્ણિમ સંકુલની મુલાકાત લીધી હતી. આ અવસરે ગુજરાત રાજ્યના માનનીય મુખ્યમંત્રી શ્રી ભુપેન્દ્રભાઈ પટેલે વિદ્યાર્થીઓ સાથે આત્મીય અને પ્રેરણાદાયક સંવાદ કર્યો હતો.
મુખ્યમંત્રીએ વિદ્યાર્થીઓને અભ્યાસ સાથે સંસ્કાર, શિસ્ત, સમયનું મૂલ્ય અને જીવનમૂલ્યો અંગે માર્ગદર્શન આપ્યું હતું તથા ભવિષ્યમાં દેશ અને સમાજ માટે જવાબદાર નાગરિક બનવા પ્રેરણા આપી હતી. તેમણે સરકાર દ્વારા શિક્ષણ ક્ષેત્રે લેવામાં આવતી વિવિધ કલ્યાણકારી યોજનાઓ અને પહેલોની માહિતી પણ આપી હતી.
આ પ્રસંગે રાજ્યના કૃષિમંત્રી શ્રી જીતુભાઈ વાઘાણી પણ ઉપસ્થિત રહ્યા હતા. મુખ્યમંત્રીએ વિદ્યાર્થીઓ માટે ગરમ નાસ્તા તેમજ અન્ય જરૂરી સુવિધાઓ સુનિશ્ચિત કરવાની સૂચનાઓ આપી હતી.
વિદ્યાલયના ટ્રસ્ટીઓ તથા શિક્ષકોએ શાળાની શૈક્ષણિક વિશેષતાઓ, વિદ્યાર્થીઓની સિદ્ધિઓ અને વિવિધ સહપાઠ્ય પ્રવૃત્તિઓ અંગે મુખ્યમંત્રીને માહિતગાર કર્યા હતા. વિદ્યાર્થીઓએ મુખ્યમંત્રી સાથે થયેલી મુલાકાતને જીવનભર યાદ રહે તેવી પ્રેરણાદાયક ક્ષણ તરીકે વર્ણવી હતી.
સતત માર્ગદર્શન અને યોગ્ય અવસરોથી ડાંગ જિલ્લાના વિદ્યાર્થીઓ રાજ્ય તથા દેશનું ગૌરવ વધારશે તેવી આશા મુખ્યમંત્રીએ વ્યક્ત કરી હતી.