जनता विद्यालयात संत गाडगे महाराज पुण्यतिथी

पिंपळगाव सराई, दि. २० डिसेंबर २०२५ —
येथील जनता विद्यालयात राष्ट्रसंत गाडगे महाराज यांच्या पुण्यतिथीनिमित्त श्रद्धा व प्रेरणादायी वातावरणात कार्यक्रम संपन्न झाला. समाजप्रबोधन, स्वच्छता व समानतेचा संदेश देणाऱ्या संत गाडगे महाराजांच्या जीवनकार्याचा आदर्श विद्यार्थ्यांसमोर मांडण्याचा उद्देश या कार्यक्रमामागे होता.
कार्यक्रमाच्या अध्यक्षस्थानी वर्गाची विद्यार्थिनी कु. अनुष्का गवते विराजमान होती. प्रमुख वक्त्या म्हणून धनश्री कोरके यांनी संत गाडगे महाराजांच्या जीवनकार्यावर प्रभावी मार्गदर्शन केले. कार्यक्रमास प्रमुख अतिथी म्हणून विद्यालयाचे पर्यवेक्षक संजय पिवटे उपस्थित होते. कार्यक्रमाचे संयोजक दिलीप शिंगणे यांनी संयोजनाची जबाबदारी समर्थपणे पार पाडली.
कार्यक्रमाचे सूत्रसंचालन कु. प्रतीक्षा गुंड व कु. नेहा गायकवाड यांनी उत्साहपूर्ण पद्धतीने केले, तर आभार प्रदर्शन कु. अपेक्षा मानमोडे हिने केले. कार्यक्रमाचे संपूर्ण नियोजन व यशस्वी अंमलबजावणी कार्यक्रम प्रमुख दिलीप शिंगणे यांच्या मार्गदर्शनाखाली करण्यात आली.
या उपक्रमासाठी विद्यालयाच्या शिक्षकवृंद, विद्यार्थी व सर्व घटकांचे सहकार्य लाभले. संत गाडगे महाराजांच्या विचारांचा संदेश विद्यार्थ्यांच्या मनात रुजवणारा हा कार्यक्रम सर्वांसाठी प्रेरणादायी ठरला.