धनंजय मुंडे–अमित शाह भेटीनंतर राजकीय हालचालींना वेग; मंत्रीपदावरून चर्चांना उधाण

बीड जिल्ह्याचे आमदार धनंजय मुंडे यांनी केंद्रीय गृहमंत्री अमित शाह यांची भेट घेतल्यानंतर राज्याच्या राजकीय वर्तुळात चर्चांना उधाण आले आहे. या भेटीनंतर मंत्रीमंडळ विस्तार व फेरबदलाबाबत नव्या शक्यता व्यक्त केल्या जात आहेत. विशेषतः विद्यमान मंत्री माणिकराव कोकाटे यांच्या जागी धनंजय मुंडे यांची मंत्रीमंडळात वर्णी लागण्याची जोरदार चर्चा सुरू झाली आहे.
या पार्श्वभूमीवर मंत्री माणिकराव कोकाटे यांचा राजीनामा घेतला जाऊ शकतो, अशीही शक्यता राजकीय जाणकारांकडून वर्तवली जात आहे. दरम्यान, धनंजय मुंडे यांनी दिल्लीत अनेक वरिष्ठ राजकीय नेत्यांच्या भेटी घेतल्याची माहिती समोर आली आहे.
मिळालेल्या माहितीनुसार, धनंजय मुंडे सकाळी सुमारे ११ वाजता संसद भवनात दाखल झाले होते. ते जवळपास एक तास संसद भवन परिसरात उपस्थित होते. याच दरम्यान त्यांनी केंद्रीय गृहमंत्री अमित शाह यांची भेट घेतल्याचे समजते. या भेटीत नेमकी कोणती चर्चा झाली, याबाबत अधिकृत माहिती समोर आलेली नसली तरी या भेटीमुळे राज्यातील राजकारणात नवे समीकरण तयार होण्याची शक्यता नाकारता येत नाही.
या घडामोडींमुळे बीडसह संपूर्ण महाराष्ट्रातील राजकीय वातावरण तापले असून, पुढील काही दिवसांत मोठे निर्णय होण्याची शक्यता व्यक्त केली जात आहे.