పార్వతీపురం: భీమారంగంలో 100% ఎఫ్‌డీఐ పెంపు అవాంఛనీయం: ఎంప్లాయిస్ యూనియన్ కార్యదర్శి టెక్కలి ధర్మారావు

పార్వతీపురం: భీమారంగంలో 100% ఎఫ్‌డీఐ పెంపు అవాంఛనీయం: ఎంప్లాయిస్ యూనియన్ కార్యదర్శి టెక్కలి ధర్మారావు

ఆల్ ఇండియా ఇన్సూరెన్స్ ఎంప్లాయీస్ అసోసియేషన్ (AIIEA) అనుబంధమైన ఇన్సూరెన్స్ కార్పొరేషన్ ఎంప్లాయిస్ యూనియన్, విశాఖపట్నం డివిజన్ పార్వతీపురం యూనిట్ కార్యదర్శి టెక్కలి ధర్మారావు మాట్లాడుతూ, ప్రధాన మంత్రి నరేంద్ర మోదీ నేతృత్వంలోని కేంద్ర మంత్రివర్గం 2025 డిసెంబర్ 12 శుక్రవారం రోజున పలు కార్పొరేట్ అనుకూల ఆర్థిక సంస్కరణలకు ఆమోదం తెలిపిందన్నారు. అందులో భాగంగా భీమా రంగంలో విదేశీ ప్రత్యక్ష పెట్టుబడుల (ఎఫ్‌డీఐ) పరిమితిని 100 శాతానికి పెంచడం, అలాగే భీమా చట్టాల సవరణ బిల్లుకు గ్రీన్ సిగ్నల్ ఇవ్వడం జరిగిందని తెలిపారు.
1999లో ఐఆర్‌డీఏ చట్టం ఆమోదం పొందడంతో భీమా రంగం జాతీయీకరణ నుండి బయటపడిందన్నారు. అప్పటి నుంచి అనేక ప్రైవేట్ భీమా కంపెనీలు, విదేశీ భాగస్వాములతో కలిసి జీవన, సాధారణ భీమా రంగాల్లో కార్యకలాపాలు నిర్వహిస్తున్నాయని చెప్పారు. అయితే ఈ కంపెనీలకు మూలధన లోపం ఎప్పుడూ సమస్యగా లేదని, వాస్తవానికి ప్రస్తుతం భీమా రంగంలో ఉపయోగిస్తున్న మొత్తం మూలధనంలో విదేశీ పెట్టుబడుల వాటా కేవలం సుమారు 32 శాతమేనని తెలిపారు.
ఇలాంటి పరిస్థితుల్లో ఎఫ్‌డీఐ పరిమితిని 100 శాతానికి పెంచడం, విదేశీ మూలధనానికి పూర్తిస్థాయి స్వేచ్ఛ ఇవ్వడం పూర్తిగా అవివేకమైన చర్యగా అభివర్ణించారు. ఈ నిర్ణయం భారత ఆర్థిక వ్యవస్థకు మాత్రమే కాకుండా దేశీయ భీమా సంస్థలకు కూడా తీవ్రమైన దుష్పరిణామాలను తీసుకువస్తుందని హెచ్చరించారు. ఇప్పటికే ఉన్న భీమా కంపెనీలను విదేశీ సంస్థలు శత్రుత్వపూరితంగా స్వాధీనం చేసుకునే ప్రమాదం ఉందన్నారు.
విదేశీ మూలధనానికి అధిక స్వేచ్ఛ ఇవ్వడం వల్ల భీమా రంగం ప్రజలకు భద్రత కల్పించే రంగంగా కాకుండా లాభాల కోసమే నడిచే వ్యాపారంగా మారుతుందన్నారు. దీని వల్ల ముఖ్యంగా సమాజంలోని బలహీన వర్గాల ప్రయోజనాలపై తీవ్ర ప్రతికూల ప్రభావం పడుతుందని పేర్కొన్నారు. దేశీయ పొదుపులకు విదేశీ మూలధనం ఎప్పటికీ ప్రత్యామ్నాయం కాదని, అలాంటప్పుడు దేశ ప్రజల పొదుపులను విదేశీ మూలధనానికి అప్పగించడం ఆర్థికంగానూ, సామాజికంగానూ ఎలాంటి అర్థం లేని చర్యగా అభివర్ణించారు.
భారతదేశం ఒక సంక్షేమ రాజ్యంగా ప్రజల సమగ్ర అభివృద్ధి కోసం పొదుపులపై ప్రభుత్వ నియంత్రణ ఉండాల్సిన అవసరం ఉందన్నారు.
భీమా కంపెనీలను భీమా కాని సంస్థలతో విలీనం చేయడానికి అనుమతి ఇవ్వడం, పార్లమెంట్ పర్యవేక్షణకు దూరంగా ఐఆర్‌డీఏకి విస్తృత అధికారాలు ఇవ్వడం, మధ్యవర్తులకు ఒకసారి నమోదు సరిపోతుందనడం, విదేశీ రీ–ఇన్సూరర్లకు నెట్ ఓన్డ్ ఫండ్స్ (ఎన్‌ఓఎఫ్) పరిమితిని ప్రస్తుతం ఉన్న రూ.5,000 కోట్ల నుండి రూ.1,000 కోట్లకు తగ్గించడం వంటి సవరణలు దేశాన్ని 1956కి ముందు పరిస్థితుల వైపు తీసుకెళ్తాయని హెచ్చరించారు. ఆ పరిస్థితులే అప్పట్లో జీవన భీమా రంగాన్ని జాతీయీకరించడానికి కారణమయ్యాయని గుర్తు చేశారు.
భీమా రంగంలో ఎఫ్‌డీఐ పరిమితిని పెంచే నిర్ణయానికి AIIEA తీవ్రంగా వ్యతిరేకిస్తోందని తెలిపారు. ఈ నిర్ణయాన్ని వెంటనే వెనక్కి తీసుకోవాలని డిమాండ్ చేస్తూ, ఇన్సూరెన్స్ యాక్ట్–1938, ఎల్‌ఐసి యాక్ట్–1956, ఐఆర్‌డీఏ యాక్ట్–1999లకు ప్రతిపాదించిన సవరణలను ప్రభుత్వం ఉపసంహరించుకోవాలని కోరారు.
కార్పొరేట్ లాభాలకు అనుకూలంగా ఉన్న ఆర్థిక విధానాలను వదిలి, ప్రజలకేంద్రీకృత విధానాల వైపు ప్రభుత్వం మళ్లాలని డిమాండ్ చేశారు. ప్రజల ప్రయోజనాలను కార్పొరేట్ లాభాల కంటే ముందు ఉంచాలని పిలుపునిచ్చారు. ఈ నిర్ణయానికి వ్యతిరేకంగా ప్రజాభిప్రాయాన్ని సమీకరించేందుకు AIIEA పోరాటం కొనసాగిస్తుందని ఆయన ప్రకటించారు.