अनोव्ह आयपी प्रायव्हेट लिमिटेडसोबत उत्तर महाराष्ट्र विद्यापीठाचा ‘बौद्धिक संपदा सामंजस्य करार’

कवयित्री बहिणाबाई चौधरी उत्तर महाराष्ट्र विद्यापीठाच्या बौद्धिक संपदा हक्क विभागामार्फत दिल्ली येथील अनोव्ह आयपी प्रायव्हेट लिमिटेड या बौद्धिक संपदा नोंदणी क्षेत्रातील अग्रगण्य कंपनीसोबत सामंजस्य करार (MoU) करण्यात आला. या करारामुळे विद्यापीठातील पेटंट व इतर बौद्धिक संपदा नोंदणी प्रक्रियेस चालना मिळणार असून, मंजूर पेटंटच्या व्यवसायिकीकरणासही सदर कंपनी महत्त्वपूर्ण सहकार्य करणार आहे.

कुलगुरू कार्यालयात आयोजित कार्यक्रमात या करारावर स्वाक्षऱ्या करण्यात आल्या. याप्रसंगी कंपनीतर्फे श्री. प्रवीण नंदन (सहयोगी संचालक), श्री. अभिषेक कुमार (सहायक संचालक) तसेच विद्यापीठाचे कुलगुरू प्रा. व्ही. एल. माहेश्वरी, प्र. कुलगुरू प्रा. एस. टी. इंगळे, बौद्धिक संपदा हक्क विभागाचे पीठासीन प्राध्यापक डॉ. डी. जी. हुंडीवाले, समन्वयक प्रा. विकास गिते आणि संशोधन अधिकारी डॉ. सारंग बारी उपस्थित होते.