بھارتی کمیونسٹ پارٹی کی صد سالہ تقریب کے موقع پر فاشزم کے خلاف خصوصی کانفرنس

ناسک
محمّد جاوید شیخ
ناسک میں بھارتی کمیونسٹ پارٹی کے صد سالہ سالِ تکمیل کے تحت “دیشا تل فاسزم چے اوہان ” کے موضوع پر ایک خصوصی کانفرنس منعقد ہوئی۔ یہ پروگرام ہفتہ، 29 نومبر 2025 کی شام 4:30 بجے اورنگبادکر ہال نہرو گارڈن کے نزدیک منعقد کیا گیا۔

تقریب کا آغاز پارٹی کے سینئر رہنما کامریڈ رام بہیتی کے خطاب سے ہوا۔ انہوں نے بھارتی کمیونسٹ پارٹی کے سو سالہ سفر، جدوجہد، قربانیوں اور نظریاتی بنیادوں پر تفصیل سے روشنی ڈالی۔ اجلاس کی صدارت ریاستی سیکریٹری کامریڈ راجو دسلے نے کی۔

اس موقع پر معروف فلم میکر شری ورن سُکھ راج نے “ لوک شاہی پڈہل فاسزم چے اوہان ” کے عنوان سے خطاب کرتے ہوئے کہا کہ ناسک سمیت ملک کے کئی علاقوں میں فاشسٹ رویوں کا مقابلہ صرف مضبوط نظریات، بات چیت اور بیداری کے ذریعے ہی ممکن ہے۔ ان کے مطابق خوف اور دباؤ کا ماحول بنا کر کوئی بھی نظریہ مسلط کرنا جمہوری اصولوں کے خلاف ہے۔

انہوں نے کہا کہ موجودہ حالات میں شہریوں کو چاہیے کہ وہ پُرامن طریقے اپناتے ہوئے اپنی آواز بلند کریں۔ ان کے مطابق سوال پوچھنا، بحث کرنا اور اختلاف رائے کا حق جمہوریت کی بنیاد ہے، اور انہی اصولوں کو دبانے کی کوشش فاشزم کی نشانی ہوتی ہے۔ سُکھ راج نے یہ بھی کہا کہ ملک کے بڑے شہروں میں بڑھتی ہوئی عدم برداشت تشویش کا باعث ہے۔ اگر عوام ڈر کر خاموش ہوجائیں تو معاشرہ ترقی نہیں کر سکتا۔

دیگر مقررین نے بھی شہریوں سے اپیل کی کہ وہ مکالمے، عوامی بیداری اور آئینی راستوں کے ذریعے جمہوری اقدار کے تحفظ میں اپنا کردار ادا کریں۔

اس موقع پر ضلع سیکریٹری کامریڈ منوہر پگارے ، سجائنٹ سیکریٹری کامریڈ روی داس بھولے اور یوتھ سیکریٹری کامریڈ طلحہ شیخ نے بتایا کہ کانفرنس میں مختلف سماجی اور ترقی پسند نظریات کے کارکنوں کی بڑی تعداد شرکت کرنے والی تھی۔

منتظمین کے مطابق یہ اجتماع فاشسٹ رجحانات کے بڑھتے ہوئے اثرات پر سنجیدہ گفتگو کا پلیٹ فارم ثابت ہوگا اور جمہوری قدروں کے تحفظ کا پیغام مزید مضبوط کرے گا