మత్తు పదార్థాల నియంత్రణకు గట్టి చర్యలు తీసుకోండి: జిల్లా కలెక్టర్/ఎస్పీ.

నంద్యాల (AIMA MEDIA): జిల్లాలో మత్తు పదార్థాల నియంత్రణను అత్యంత ప్రాధాన్యంతో తీసుకుంటూ, వాటి నివారణకు కఠిన చర్యలు చేపట్టనున్నట్టు జిల్లా కలెక్టర్ జి. రాజకుమారి గనియా స్పష్టం చేశారు. శనివారం కలెక్టరేట్‌లోని పి.జి.ఆర్.ఎస్ హాలులో జిల్లా ఎస్పీ శ్రీ సునీల్ షొరాణ్ తో కలిసి మత్తు పదార్థాల నియంత్రణపై సమీక్షా సమావేశాన్ని నిర్వహించారు.ఈ సందర్భంగా జిల్లా కలెక్టర్ జి. రాజకుమారి మాట్లాడుతూ... మత్తు పదార్థాల అరికట్టడంలో మొత్తం యంత్రాంగం అప్రమత్తంగా ఉండాలని కోరారు. గంజాయి సహా ఇతర మాదకద్రవ్యాల నియంత్రణకు కట్టుదిట్టమైన పర్యవేక్షణతో పాటు ప్రజల్లో విస్తృత అవగాహన కల్పించేందుకు ప్రత్యేక కార్యక్రమాలు చేపట్టాలని సూచించారు. విద్యార్థి దశ నుంచే మాదకద్రవ్యాల ప్రమాదాలపై అవగాహన కల్పించాల్సిన అవసరం ఉందని ఆమె పేర్కొన్నారు. పాఠశాలలు, కళాశాలల్లో ఉపాధ్యాయులు డ్రగ్స్‌కు వ్యతిరేకంగా సలహాలు, సూచనలు ఇవ్వాలని, విద్యాసంస్థల స్థాయిలోనే నివారణ చర్యలు బలోపేతం చేయాలని సూచించారురాష్ట్ర ప్రభుత్వం ప్రజల నుంచి నేరుగా సమాచారం సేకరించేందుకు ఐవిఆర్ఎస్, క్యూఆర్ కోడ్, వాట్సాప్ గవర్నర్స్ నెంబరు (9552300009) వంటి పద్ధతులను అమలు చేస్తుందనీ, ఈ ప్లాట్‌ఫారమ్‌ల ద్వారా వచ్చిన సమాచారం మేరకే జిల్లాలకు ర్యాంకింగ్ ఇవ్వబడుతోందన్నారు. మత్తు పదార్థాల విక్రయం, వాడకం, రవాణాపై ఎప్పటికప్పుడు గమనిస్తూ పర్యవేక్షణను మరింత బలపరచాలని పోలీసు, ఎక్సైజ్ అధికారులను ఆమె ఆదేశించారు.జిల్లా ఎస్పీ సునీల్ షెరాన్ మాట్లాడుతూ పాఠశాలలు, కళాశాలల స్థాయిలో మత్తు పదార్థాల నివారణపై అవగాహన కార్యక్రమాలు విస్తృతంగా నిర్వహిస్తున్నామని తెలిపారు. మత్తు పదార్థాల నియంత్రణలో మూలాలను గుర్తించి అరికట్టడం అత్యంత కీలకమైందని, దీనివల్ల పెద్ద సమస్యలు తగ్గే అవకాశం ఉంటుందని పేర్కొన్నారు. విద్యాసంస్థల వద్ద అనుమానాస్పద వ్యక్తులు, చర్యలు కనిపించినప్పుడు వెంటనే పోలీసులకు సమాచారం ఇవ్వాలని ప్రజల్లో చైతన్యం పెంచుతున్నామని చెప్పారు. రైల్వే స్టేషన్లు, రవాణా వాహనాలు, ప్రజా ప్రదేశాల్లో ఆకస్మిక తనిఖీలు కొనసాగుతున్నాయని జిల్లా ఎస్పీ తెలిపారు.