వగ్గంపల్లిలో ఎస్‌.ఎస్‌.సి. పరీక్షా కేంద్రం ఏర్పాటు చేయాలి..... గ్రామీణ విద్యార్థుల ఇబ్బందులు దృష్ట్యా డిమాండ్

వగ్గంపల్లిలో ఎస్‌.ఎస్‌.సి. పరీక్షా కేంద్రం ఏర్పాటు చేయాలి.....

గ్రామీణ విద్యార్థుల ఇబ్బందులు దృష్ట్యా డిమాండ్

పది తరగతి గదులు – 200 సీట్ల సామర్థ్యం – అవసరమైన సదుపాయాలన్నీ సిద్ధం

పామూరుకు 15 కి.మీ ప్రయాణం విద్యార్థులపై భారమైందని విద్యార్థులు, తల్లిదండ్రులు, బోధకులు వినతి

క్రౌన్ హ్యూమన్ రైట్స్ కనిగిరి నవంబర్ 22

ప్రకాశం జిల్లా పామూరు మండలానికి చెందిన వగ్గంపల్లి జిల్లా పరిషత్ ఉన్నత పాఠశాలలో ఎస్‌.ఎస్‌.సి. పరీక్షా కేంద్రాన్ని కొత్తగా ఏర్పాటు చేయాలని స్థానిక విద్యార్థులు, తల్లిదండ్రులు, ఉపాధ్యాయులు డిమాండ్ చేస్తున్నారు. ప్రస్తుతం ఎస్‌.ఎస్‌.సి. పరీక్షలు పామూరులోనే జరుగుతుండటంతో వగ్గంపల్లి, చిలమకూరు, వీరభద్రాపురం, పడమట కట్టకిందపల్లి, నర్రమారెల్ల, మార్కొండాపురం వంటి గ్రామాల నుండి సుమారు 200 మందికి పైగా విద్యార్థులు 15 కి.మీ దూరం ప్రయాణించాల్సి వస్తోంది.గ్రామీణ ప్రాంతాల్లో రవాణా సౌకర్యాల లేమి, ఎండాకాల పరీక్షల సమయంలో ఎదురయ్యే ప్రయాణ ఇబ్బందులు, భద్రత సమస్యలు విద్యార్థులపై తీవ్ర ప్రభావం చూపుతున్నాయని తల్లిదండ్రులు ఆందోళన వ్యక్తం చేస్తున్నారు.వగ్గంపల్లి జడ్పీ హై స్కూల్‌లో పరీక్షా కేంద్రం నిర్వహించేందుకు అవసరమైన అన్ని సదుపాయాలు ఇప్పటికే సిద్ధంగా ఉన్నాయని ఉపాధ్యాయులు తెలిపారు. పాఠశాలలో పది విశాలమైన తరగతి గదులు, 200 మందికి సరిపడే సీటింగ్ వ్యవస్థ, తగినంత ఫర్నిచర్, ప్రహరీ గోడ, విస్తృతమైన ప్రాంగణం అందుబాటులో ఉన్నాయి. అంతేకాకుండా జాతీయ రహదారి పక్కనే ఉండటం వలన పర్యవేక్షణ, రవాణా సౌకర్యాలు మరింత సులభం అవుతాయని స్థానికులు అంటున్నారు.పాఠశాల చుట్టుపక్కల 4 నుంచి 9 కి.మీ పరిధిలో ఐదు హైస్కూల్లు ఉండటం కూడా ఈ కేంద్రం ఏర్పాటుకు అనుకూలం అని ఉపాధ్యాయులు పేర్కొన్నారు.ఈ నేపథ్యంలో వగ్గంపల్లి జిల్లా పరిషత్ ఉన్నత పాఠశాలలో ఎస్‌.ఎస్‌.సి. పరీక్షా కేంద్రాన్ని ఏర్పాటుచేయాలని ఆంధ్రప్రదేశ్ ప్రభుత్వ పరీక్షల డైరెక్టర్‌కు తల్లిదండ్రులు, విద్యావంతులు, స్థానిక ఉపాధ్యాయులు విజ్ఞప్తి చేశారు. ఈ నిర్ణయం తీసుకుంటే గ్రామీణ విద్యార్థుల భద్రత, సౌలభ్యం మరియు ఫలితాల మెరుగుదలకు దోహదం చేస్తుందని వారు అభిప్రాయపడ్డారు.