३१ वर्षांपासून फरार असलेल्या घरफोडी प्रकरणातील आरोपीस लातूर पोलीस विशेष पथकाने केली अटक.

३१ वर्षांपासून फरार असलेल्या घरफोडी प्रकरणातील आरोपीस लातूर पोलीस विशेष पथकाने केली अटक.

लातूर पोलीसांच्या विशेष पथकाने डारमंड फाईलमध्ये नोंद असलेल्या घरफोडीच्या गंभीर गुन्ह्यात ३१ वर्षांपासून पोलीस व न्यायालयास चकवा देत फरार असलेल्या आरोपीस अटक करून एक महत्त्वपूर्ण कामगिरी साध्य केली आहे.

पोलीस स्टेशन गांधीचौक, लातूर येथे गु.र. नं. २०/१९९४, कलम ४५७, ३८०, ३४ भादंवि प्रमाणे गुन्हा दाखल होता. तसेच आरसीसी नं. ३९४/१९९४ व डी.एफ. नं. ५८/२०१४ या डारमंड फाईल प्रकरणातही आरोपीचा समावेश होता. दि. १०/०२/१९९४ ते ११/०२/१९९४ च्या रात्री फिर्यादी दत्तू बाबू नवघन (रा. झिन्नत सोसायटी, लातूर) यांच्या घरात तीन आरोपींनी संगनमताने घराचे कुलूप व दाराची कोंडी तोडून घरात प्रवेश करत ₹११,००० रोख रक्कम , २४ साड्या व इतर घरगुती साहित्य असा एकूण ₹१६,४२५/- किंमतीचा मुद्देमाल चोरीस नेण्यात आला होता. या प्रकरणातील आरोपी गुन्हा दाखल झाल्यापासून फरार राहून पोलीस व न्यायालयापासून लपून राहत होता.
विशेष पथकास प्राप्त झालेल्या गुप्त माहितीनुसार, आरोपी दिपक निवृत्ती कांबळे, वय ५५ वर्षे, रा. विलासनगर, लातूर हा मागील काही दिवसांपासून विलासनगर परिसरात वास्तव्य करत असल्याचे समजले.
यानंतर विशेष पथकाने मिळालेल्या माहितीस पडताळणी करून ही कारवाई केली
मिळालेली गोपनीय माहिती वरिष्ठ अधिकारी यांना कळवून दिनांक १७/११/२०२५ रोजी सकाळी आरोपीच्या घरावर पथकाने धाड टाकली व आरोपीस ताब्यात घेण्यात आले आहे.आरोपीस अटक करून मा. न्यायालय समक्ष हजर करण्यात आले असता मा. न्यायालयाने आरोपीस न्यायालयीन कोठडी सुनावली आहे.

सदरची कारवाई पोलीस अधीक्षक, श्री. अमोल तांबे, अपर पोलीस अधीक्षक, श्री. मंगेश चव्हाण, उपविभागीय पोलीस अधिकारी, लातूर शहर, श्री. समीरसिंह साळवे यांचे मार्गदर्शनात सपोनि श्री. मनाळे, पोलीस अमलदार दत्तात्रय शिंदे, वालचंद नागरगोजे,योगेश गायकवाड श्रीकांत कुंभार यांनी केली आहे.
लातूर पोलीस विशेष पथकाने ३१ वर्षांपासून फरार झालेल्या आरोपीस अटक करून डारमंड फाईलमधील एक महत्त्वपूर्ण प्रलंबित गुन्हा उघडकीस आणत प्रशंसनीय कामगिरी केली आहे. भविष्यातही अशा प्रलंबित आणि फरार आरोपींविरुद्ध कठोर कारवाई करण्यात येणार आहे.