प्रतिबंधित पदार्थांचा वापर झाल्यास कठोर कारवाई करावी अन्न व औषध प्रशासन मंत्री नरहरी झिरवाळ

प्रतिबंधित पदार्थांचा वापर झाल्यास कठोर कारवाई करावी
अन्न व औषध प्रशासन नरहरी झिरवाळ

उपहारगृह व हॉटेलच्या ठिकाणी स्वच्छतेला प्रोत्साहन देण्यासाठी अभियान राबविणार

मुंबई, दिनांक १९ ः- राज्यात आरोग्याला घातक असलेल्या प्रतिबंधित पदार्थांचा वापर आणि अशा पदार्थांची विक्री होत असल्यास कठोर कारवाई करावी, तसेच असे प्रकार रोखण्यासाठी सतर्क राहावे,
असे निर्देश अन्न व औषध प्रशासन व विशेष सहाय्य विभागाचे मंत्री नरहरी झिरवाळ यांनी दिले.
मंत्रालयात अन्न व औषध प्रशासन मंत्री श्री. झिरवाळ यांच्या अध्यक्षतेखाली अन्न व औषध प्रशासन विभागाची आढावा बैठक आयोजित करण्यात आली होती. या वेळी विभागाचे आयुक्त श्रीधर डुबे पाटील, सहआयुक्त (दक्षता)डॉ.राहुल खाडे, सहआयुक्त (अन्न) मंगेश माने उपस्थित होते.
मंत्री श्री.झिरवाळ म्हणाले, प्रतिबंधित असलेल्या गुटका व तत्सम पदार्थांचे विक्री शाळा अथवा कोणत्याही परिसरात होणार नाही याची दक्षता संबंधित कार्यक्षेत्राच्या अधिकाऱ्यांनी घेणे गरजेचे आहे. या दृष्टीने वेळोवेळी काटेकोर अंमलबजावणी बाबत सूचना देण्यात आल्या आहेत. सदर अधिकारी या दृष्टीने असक्षम ठरल्यास त्यांच्यावर देखील कारवाई केली जाईल, असे अन्न व औषध प्रशासन मंत्री म्हणाले.
नागरिकांना स्वच्छ आणि सकस आहार मिळावा तसेच उपहारगृह व हॉटेलच्या ठिकाणी अधिक चांगले वातावरण राहावे. या दृष्टीने लवकरच राज्यात अभियान राबविण्यात येणार असून यामध्ये चांगले काम करणाऱ्यांना गौरवण्यात येईल. यासाठी शहरांसह ग्रामीण भागात तालुकास्तरावर देखील यासाठी नियोजन केले जावे. या दृष्टीने विभागाने कार्यवाही करावी, अशी संकल्पना मंत्री श्री झिरवाळ यांनी मांडली.