हडपसर परिसरात बिबट्याचे दर्शन; वनविभाग सतर्क, नागरिकांमध्ये चिंता

पुणे : १६ नोव्हेंबर,
हडपसर परिसरात आज पहाटे बिबट्या दिसल्याची घटना घडली असून नागरिकांमध्ये भीतीचे वातावरण निर्माण झाले आहे. ग्लायइडिंग सेंटर –सासवड रोडलगतच्या वसाहतींमध्ये काही रहिवाशांनी बिबट्या धावताना पाहिल्याचे सांगितले. याप्रकरणी स्थानिकांनी तातडीने वनविभागाला सूचना दिली.
रहिवाशांच्या घराबाहेर बसवलेल्या सीसीटीव्ही कॅमेऱ्यात हा बिबट्या कैद झाल्याची माहिती मिळाली आहे. पहाटे साडेपाच वाजण्याच्या सुमारास बिबट्या काही क्षण परिसरात फिरला आणि नंतर झाडीत अदृश्य झाला, अशी माहिती स्थानिकांनी दिली.
सूचना मिळताच वनविभागाची टीम घटनास्थळी दाखल झाली. पगमार्कची तपासणी, ड्रोन सर्व्हे आणि गस्त वाढवण्याची प्रक्रिया सुरू करण्यात आली आहे. आवश्यक असल्यास परिसरात पिंजरे लावण्याची तयारीही विभागाने केली असल्याचे समजते.
वनविभागाच्या अधिकाऱ्यांनी सांगितले की, “नागरिकांनी घाबरून जाऊ नये. परिस्थितीवर आमचे बारीक लक्ष आहे. बिबट्या बहुधा अन्नाच्या शोधात नागरी वसाहतीकडे वळला असावा. सुरक्षिततेसाठी आवश्यक उपाययोजना करण्यात येत आहेत.”
दरम्यान, नागरिकांना सावधगिरीचे आवाहन करण्यात आले आहे. विशेषतः पहाटे-संध्याकाळी बाहेर जाताना काळजी घ्यावी, लहान मुलांना एकटे सोडू नये, तसेच उघड्यावर अन्न किंवा कचरा टाकू नये, असे निर्देश देण्यात आले आहेत.
या घटनेमुळे हडपसर परिसरात तणावाचे वातावरण असून नागरिक सतर्क झाले आहेत. वनविभागाच्या पथकांकडून परिसरात सतत गस्त घालण्यात येत असून बिबट्याचा शोध सुरू आहे.