تلنگانہ اُردو اکیڈیمی کے زیر اہتمام کارنامہ حیات ایوارڈ (مجموعی خد مات پر ا نعامات)برائے سال 2025ء کی درخواستیں داخل کرنے کی تاریخ میں توسیع

حیدرآباد۔ 17 /اکتوبر۔ (سرفراز نیوز ایجنسی)۔ تلنگانہ اُردو اکیڈیمی کی جانب سے سال2025 کے لئے اُردو ادیبوں اسکالروں‘ شاعروں‘ صحافیوں اور اُردو زبان و ادب کے فروغ کے سلسلہ میں کام کرنے والے اصحاب کی خدمات کے اعتراف میں پیش کرنے”کارنامہ حیات ایوارڈ(مجوعی خدمات پر انعامات)“ دیے جائیں گے۔اس خصو ص میں اُردو زبان و ادب کے فروغ کے سلسلہ میں مختلف زمروں میں کام کرنے والے اصحاب سے درخواستیں طلب کی جارہی ہیں۔ جناب طاہر بن حمدانصدر تلنگانہ اُردو اکیڈیمی نے اپنے صحافتی بیان میں تفصیلات بتاتے ہوئے کہا کہ ریاست تلنگانہ میں فروغ اُردو کے ضمن میں مختلف زمروں میں ہر سال 7 ایوارڈزدئے جاتے ہیں‘ ان ایوارڈ ز میں شاعری میں دو ایوارڈزحضرت امجد حیدرآبادی ایوارڈاور سعید شہیدی ایوارڈ‘تنقید و تحقیق میں ڈاکٹر محی الدین قادری زور ایوارڈ‘ نثر میں ڈاکٹر آغا حیدرحَسن ایوارڈ‘تعلیم و تدریس میں پروفیسر حبیب الرحمن ایوارڈ‘ صحافت میں محبوب حسین جگر ایوارڈ اور فروغ اُردو میں سری نواس لاہوٹی ایوارڈ شامل ہیں۔ انہوں نے بتایا کہ اس طرح سال 2025ء کے جملہ (7) ایوارڈ دیے جائیں گے۔ جناب طاہر بن حمدان نے بتایا کہ یہ ایوارڈ فی کس مبلغ - /50,000روپے‘توصیف نامہ اورمیمنٹو پر مشتمل ہے۔انہوں نے بتایاکہ اِن ایوارڈز کے انتخاب کے سلسلہ میں ماہرین کی ایک کمیٹی تشکیل دی جاتی ہے جو متفقہ طور پر انعام کے لئے شخصیات کا انتخاب کرتی ہے۔انہو ں نے بتایا کہ ان ایوارڈز کے لئے ریاست تلنگانہ کے ادیب‘ شاعر‘ نقاد‘ ماہرین تعلیم‘ صحافی اور فروغ اُردو کے لئے کام کرنے والے اصحاب اپنی درخواستیں ایک عدد تصویر‘ مکمل بائیوڈاٹا‘بینک اکاؤنٹ کی تفصیلات‘ آدھار کارڈ کی فوٹو کاپی‘اُردو زبان و ادب کے فروغ کے سلسلہ میں ان کی کارکردگی و دیگر ضروری تفصیلات مع دستاویزی ثبوت کے ساتھ 30/اکتوبر 2025ء توسیع شدہ تاریخ تک داخل کئے جاسکتے ہیں۔ صَدر دفترتلنگانہ اُردو اکیڈیمی چوتھی منزل‘ حج ہاؤز‘ نامپلی حیدرآباد میں بالمشافہ یا ذریعہ پوسٹ داخل کرسکتے ہیں۔جناب محمد صفی اللہ ڈائرکٹر/سکریٹری نے بتایا کہ مذکورہ ایوارڈ کے لئے درخواست اکیڈیمی کے جاری کردہ پروفارماکے ساتھ داخل کرنی ہوگی اور2024ء کی موصولہ درخواستیں بھی زیر غور ہیں۔ مذکورہ پروفارما صدر دفترتلنگانہ اردواکیڈیمی سے حاصل کیا جاسکتاہے۔انہوں نے کہا کہ ایک سے زائد زمروں کے لئے درخواست گزار ہر زمرہ کے لئے علحدہ درخواست داخل کریں۔ جناب محمد صفی اللہ ڈائرکٹر/سکریٹری تلنگانہ اُردو اکیڈیمی نے بتایا کہ سابق میں اس اسکیم کے تحت تلنگانہ اُردو اکیڈیمی سے ایوارڈ یافتہ اصحاب دوبارہ درخواست دینے کے اہل نہیں ہونگے۔